சீனாவின் விசா இல்லா நுழைவு…!!

சீனாவின் விசா இல்லா நுழைவு…!! எந்த நாடுகளுக்கு இந்த சலுகை..??

சீனா சமீபத்தில் வெளியிட்டுள்ள முக்கிய அறிவிப்பின் படி, பிரிட்டன் மற்றும் கனடா நாட்டினரைச் சேர்ந்த சாதாரணக் கடவுச்சீட்டு வைத்திருப்போர் இனி விசா இன்றி சீனாவிற்குள் நுழையலாம். இந்த நடைமுறை நாளை (17.02.26) முதல் அமலுக்கு வருகிறது. இது இவ்வாண்டு டிசம்பர் 31 வரை நடைமுறையில் இருக்கும் என்றும் தெரிவிக்கப்பட்டுள்ளது.

இந்தச் சலுகையின் கீழ், சம்பந்தப்பட்ட நாடுகளின் குடிமக்கள் வர்த்தகம், சுற்றுலா, உறவினர் மற்றும் நண்பர்களைச் சந்தித்தல், கலாச்சார பரிமாற்றம் அல்லது இடைநிலைக் கடத்தல் பயணம் போன்ற நோக்கங்களுக்காக அதிகபட்சம் 30 நாட்கள் வரை சீனாவில் தங்கலாம்.

பிரிட்டன் பிரதமர் கீர் ஸ்டார்மர் மற்றும் கனடா பிரதமர் மார்க் கார்னி ஆகியோரின் சமீபத்திய பெய்ஜிங் பயணத்திற்குப் பின்னர் இந்த முடிவு உறுதி செய்யப்பட்டதாக கூறப்படுகிறது. சீன அதிபர் ஷி ஜின்பிங் தலைமையிலான உயர்மட்ட பேச்சுவார்த்தைகளில் இருநாடுகளுக்கிடையிலான உறவை வலுப்படுத்துவது குறித்து முக்கியமான விவாதங்கள் நடைபெற்றன.

மக்கள் இடையிலான தொடர்புகளை மேலும் எளிதாக்கும் நோக்கத்துடன் இந்த நடவடிக்கை எடுக்கப்பட்டதாக சீன வெளிநாட்டு விவகார அமைச்சகம் விளக்கியுள்ளது. உலக நாடுகளுடன் உறவை விரிவுபடுத்தும் முயற்சியின் ஒரு பகுதியாகவும் இந்த அறிவிப்பு பார்க்கப்படுகிறது.