6 நாட்களில் 100+ மீட்புப் பணிகள்..!! நேபாளத்தின் முதல் பெண் ஹெலிகாப்டர் கேப்டனின் அசாத்திய சாதனை..!
நேபாளம்: நேபாளத்தில் ஏற்பட்ட கடும் வெள்ளம் மற்றும் நிலச்சரிவால் பல பகுதிகள் பெரும் பாதிப்பை சந்தித்துள்ள நிலையில், மீட்புப் பணிகளில் துணிச்சலுடன் செயல்பட்டு உலகின் கவனத்தை ஈர்த்துள்ளார் நாட்டின் முதல் பெண் ஹெலிகாப்டர் கேப்டன் ப்ரியா அதிகாரி (Priya Adhikari).
ரசுவா மாவட்டத்தின் வெள்ளத்தால் மிக மோசமாக பாதிக்கப்பட்ட திமுரே (Timure) பகுதியில், கடந்த ஆறு நாட்களில் மட்டும் சுமார் 100 மீட்பு விமானப் பயணங்களை மேற்கொண்டு, பேரிடரில் சிக்கியவர்களை பாதுகாப்பான இடங்களுக்கு அழைத்துச் சென்றுள்ளார்.
6 நாட்களில் 100+ மீட்புப் பணிகள்..!
வெள்ளம் மற்றும் நிலச்சரிவால் சாலைகள் துண்டிக்கப்பட்டு, பல பகுதிகள் சேறும் சகதியுமாக மாறியதால் தரைவழி மீட்புப் பணிகள் கடினமாகியுள்ளன. இதனால் ஹெலிகாப்டர்கள் மூலம் மீட்புப் பணிகள் தீவிரப்படுத்தப்பட்டன.
திமுரே பகுதியில் ஒரே நேரத்தில் சுமார் 20 ஹெலிகாப்டர்கள் மீட்புப் பணியில் ஈடுபட்டதாக தெரிவிக்கப்பட்டுள்ளது. சில நேரங்களில் 5 அல்லது 6 ஹெலிகாப்டர்கள் ஒரே இடத்தில் தரையிறங்கி மக்களை மீட்க வேண்டிய சூழலும் ஏற்பட்டுள்ளது. இதனால் விமானிகள் தொடர்ந்து வானொலி மூலம் ஒருவருக்கொருவர் தகவல்களைப் பரிமாறிக் கொண்டு மிகவும் கவனமாக செயல்பட்டனர்.
வெள்ளத்தால் பாதிக்கப்பட்ட சில பகுதிகளில் தரை மிகவும் ஆபத்தான நிலையில் இருந்ததாக ப்ரியா அதிகாரி தெரிவித்துள்ளார். மேலிருந்து பார்க்கும்போது தரை உறுதியானதாகத் தோன்றினாலும், உண்மையில் அது மிகவும் மென்மையான சேறு மற்றும் சகதியாக இருந்ததால் ஹெலிகாப்டர் தரையிறங்கும்போது சிக்கிக் கொள்ளும் அபாயம் இருந்துள்ளது.
சில இடங்களில் மீட்புப் பணிகளை விரைவாக மேற்கொள்ள, ஹெலிகாப்டரின் இயந்திரத்தை முழுமையாக நிறுத்தாமல் இயக்கத்திலேயே வைத்துக்கொண்டு பயணிகளை ஏற்றிச் செல்ல வேண்டிய நிலையும் ஏற்பட்டதாக அவர் கூறியுள்ளார்.
திமுரே பகுதியில் மீட்புப் பணிகள் தொடங்கிய முதல் இரண்டு நாட்களிலேயே 200-க்கும் மேற்பட்டோர் பாதுகாப்பாக வெளியேற்றப்பட்டுள்ளனர். நேபாள ராணுவத்தின் Augusta ஹெலிகாப்டர்கள் உள்ளிட்ட பல ஹெலிகாப்டர்களும் இந்த மீட்புப் பணியில் ஈடுபட்டன.
ஆனால் மீட்புப் பணிகளுக்கு இடையே பேரழிவின் கொடூரமான காட்சிகளையும் ப்ரியா அதிகாரி நேரில் பார்த்துள்ளார். வெள்ளம் மற்றும் நிலச்சரிவால் அழிந்த பகுதிகளில் உயிரிழந்தவர்களின் உடல்கள் சிதறிக் கிடந்ததை ஹெலிகாப்டரில் இருந்து பார்த்ததாக அவர் தெரிவித்துள்ளார்.
யார் இந்த ப்ரியா அதிகாரி?
40 வயதான ப்ரியா அதிகாரி, முதலில் Environmental Science படித்துள்ளார். பின்னர் விமானப் பணிப்பெண்ணாக (Cabin Crew) பணியாற்றியபோது ஹெலிகாப்டர் பயணம் ஒன்றில் ஏற்பட்ட ஆர்வம், அவரை விமானத் துறைக்குள் அழைத்துச் சென்றது.
அதன்பிறகு பிலிப்பைன்ஸுக்குச் சென்று ஹெலிகாப்டர் பைலட் பயிற்சி பெற்ற அவர், தேவையான விமானப் பயிற்சி நேரங்களை நிறைவு செய்து 2017ஆம் ஆண்டு முழுநேர ஹெலிகாப்டர் பைலட்டாக பணியாற்றத் தொடங்கினார்.
பின்னர் உயரமான மலைப்பகுதிகளில் மீட்புப் பணிகளில் நிபுணத்துவம் பெற்றார். இமயமலைப் பகுதிகளில் சுமார் 6,200 மீட்டர் உயரம் வரை சென்று மீட்புப் பணிகளை மேற்கொண்ட அனுபவமும் அவருக்கு உள்ளது. எவரெஸ்ட் உள்ளிட்ட உயரமான பகுதிகளில் சிக்கிய மலையேற்ற வீரர்களை மீட்கும் பணிகளிலும் அவர் ஈடுபட்டுள்ளார்.
தொடர்ச்சியாக பல நாட்கள் மீட்புப் பணிகளில் ஈடுபட்டதால் தானும் சக விமானிகளும் மிகவும் சோர்வடைந்துள்ளதாக ப்ரியா அதிகாரி தெரிவித்துள்ளார். இருப்பினும், இத்தகைய அவசரநிலைகளில் செயல்படுவதற்காகவே தாங்கள் பயிற்சி பெற்றுள்ளதாக அவர் கூறியுள்ளார்.
மிகப்பெரிய பேரழிவின் நடுவிலும், ஹெலிகாப்டர் தரையிறங்கும்போது உயிர் தப்பியவர்கள் நம்பிக்கையுடன் கைகளை அசைப்பதைப் பார்ப்பதே தங்களுக்கு தொடர்ந்து பணியாற்றும் வலிமையை அளிப்பதாகவும் அவர் தெரிவித்துள்ளார்.
நேபாளத்தின் முதல் பெண் ஹெலிகாப்டர் கேப்டனாக மட்டுமின்றி, ஆபத்தான இமயமலைப் பகுதிகளில் மீட்புப் பணிகளில் முன்னணியில் செயல்பட்டு வரும் ப்ரியா அதிகாரியின் இந்த துணிச்சல், பேரிடர் காலங்களில் மனித உயிர்களைக் காப்பாற்றும் பணியின் மகத்துவத்தை உலகிற்கு மீண்டும் உணர்த்தியுள்ளது. அதே நேரத்தில், ஆபத்தான விமானத் துறையிலும் பெண்கள் தங்களது திறமையால் புதிய வரலாற்றை உருவாக்க முடியும் என்பதற்கும் அவரது சாதனை ஒரு சிறந்த எடுத்துக்காட்டாக அமைந்துள்ளது.
Follow us on : click here
Premium Job Link:https://www.sgtamilan.com/product/premium-member-ship
WHATSAPP CHANNEL LINK