‘Ghost Employees’ மோசடி..? சிங்கப்பூரில் 4 பேர் கைது.. 21 பேரிடம் விசாரணை..!

சிங்கப்பூரில் வெளிநாட்டு ஊழியர்களை பணியமர்த்துவது தொடர்பான சட்டத்தை மீறியதாக சந்தேகிக்கப்படும் கட்டுமான நிறுவனத்தைச் சேர்ந்த 2 இயக்குநர்கள் மற்றும் 2 ஊழியர்கள் கைது செய்யப்பட்டுள்ளனர். மேலும், ‘Ghost Employees’ எனப்படும் ‘போலி ஊழியர்கள்’ ஏற்பாட்டில் தொடர்புடையதாகக் கருதப்படும் 21 பேர் விசாரணைக்கு உதவி செய்து வருகின்றனர்.

மனிதவள அமைச்சகம் (MOM) இன்று (செப்டம்பர் 4) வெளியிட்ட அறிக்கையில் இந்த தகவலை தெரிவித்துள்ளது.
செப்டம்பர் 2ஆம் தேதி மேற்கொள்ளப்பட்ட அமலாக்க நடவடிக்கையின்போது கட்டுமான நிறுவனத்தைச் சேர்ந்த 2 இயக்குநர்கள் மற்றும் 2 ஊழியர்கள் கைது செய்யப்பட்டனர்.

வெளிநாட்டு மனிதவள வேலைவாய்ப்பு சட்டத்தை (Employment of Foreign Manpower Act) மீறியுள்ளார்களா என்பது குறித்து அதிகாரிகள் விசாரணை நடத்தி வருகின்றனர். குறிப்பாக, வேலை அனுமதிக்கு விண்ணப்பிக்கும்போது தவறான தகவல்களை அளித்தல் மற்றும் வேலைவாய்ப்புடன் தொடர்புடைய பலன்களைப் பெறுதல் போன்ற குற்றச்சாட்டுகள் குறித்து விசாரணை நடைபெற்று வருகிறது.