சிங்கப்பூர் நோக்கிச் சென்ற பனாமா சரக்கு கப்பல் கடலில் மூழ்கியது..!!22 மாலுமிகளைத் தேடும் பணி தீவிரம்..!

வங்காள விரிகுடா கடலில் பனாமா கொடியுடன் சென்ற MV Ocean Winner என்ற சரக்குக் கப்பல் மூழ்கியதில், அதில் இருந்த 24 மாலுமிகளில் 22 பேர் மாயமாகியுள்ளனர். இதையடுத்து இந்திய கடலோரக் காவல்படை மற்றும் இந்திய கடற்படை இணைந்து தீவிர தேடுதல் மற்றும் மீட்புப் பணியில் ஈடுபட்டு வருகின்றன.

இந்த சரக்குக் கப்பல் ஒடிசாவின் பாரதீப் துறைமுகத்திலிருந்து புறப்பட்டு வங்காள விரிகுடா பகுதியில் சென்று கொண்டிருந்தபோது கடலில் மூழ்கியது. பாரதீப் கடற்கரையிலிருந்து சுமார் 230 முதல் 240 கடல் மைல் (சுமார் 430–444 கி.மீ.) தொலைவில் இந்தச் சம்பவம் நடைபெற்றதாக தகவல்கள் தெரிவிக்கின்றன.

சிங்கப்பூர் நோக்கிச் சென்ற கப்பல்:
MV Ocean Winner கப்பல் இரும்புத் தாதுவை ஏற்றிக்கொண்டு சிங்கப்பூர் நோக்கிச் சென்றதாக பல்வேறு தகவல்கள் தெரிவிக்கின்றன. கப்பல் பாரதீப் துறைமுகத்திலிருந்து ஆகஸ்ட் 20ஆம் தேதி புறப்பட்டதாகவும் கூறப்படுகிறது.

விபத்து நேரத்தில் கப்பலில் மொத்தம் 24 மாலுமிகள் இருந்தனர். அவர்களில் 20 பேர் சீனர்கள், 3 பேர் மியான்மர் நாட்டவர்கள் மற்றும் ஒருவர் வங்கதேசத்தைச் சேர்ந்தவர் என அதிகாரிகள் தெரிவித்துள்ளனர்.