குழந்தை தத்தெடுப்பு நடைமுறைகளை மறுபரிசீலனை செய்யும் சிங்கப்பூர்..!! காரணம்..???
இந்தோனேசிய குழந்தை கடத்தல் வழக்கு தொடர்பான உண்மைகள் முழுமையாக தெளிவுபடுத்தப்பட்ட பிறகு, சிங்கப்பூரின் குழந்தை தத்தெடுப்பு செயல்முறைகள் மறுபரிசீலனை செய்யப்படும் என்று சமூக மற்றும் குடும்ப மேம்பாட்டு அமைச்சகம் தெரிவித்துள்ளது.
இந்த விவகாரத்தில் சம்பந்தப்பட்ட சிங்கப்பூர் அமைப்புகள் இந்தோனேசிய அதிகாரிகளுடன் நெருக்கமாக இணைந்து செயல்பட்டு வருகின்றன.
இந்தோனேசிய அதிகாரிகள் கைப்பற்றிய ஆவணங்கள் மற்றும் பதிவுகளின் அடிப்படையில், மேற்கு ஜாவாவில் செயல்பட்ட குற்றவியல் குழு குறைந்தது 25 குழந்தைகளை கடத்தியதாகவும், அவர்களில் 15 பேர் சிங்கப்பூருக்கு கொண்டு வரப்பட்டதாகவும் தெரிய வந்துள்ளது. இந்த விவகாரம் தொடர்பாக சமூக மற்றும் குடும்ப மேம்பாட்டு அமைச்சர் மசகோஸ் சுல்கிஃப்லி நாடாளுமன்றத்தில் எழுத்துப்பூர்வமாக பதிலளித்தார்.
வழக்கின் முழு விவரங்கள் தெளிவான பின்னர், தற்போதுள்ள தத்தெடுப்பு நடைமுறைகளை வலுப்படுத்த வேண்டிய தேவையுண்டா என்பதை அமைச்சகம் மதிப்பாய்வு செய்யும் என அவர் தெரிவித்தார்.
அதே நேரத்தில், கூடுதல் கட்டுப்பாடுகள் தத்தெடுப்பு செயல்முறையை தேவையற்ற வகையில் தாமதப்படுத்தக் கூடும் என்பதையும் அதிகாரிகள் கவனத்தில் எடுத்துக்கொள்வார்கள் என கூறப்பட்டது.
கடுமையான சோதனைகள் சில சந்தர்ப்பங்களில் வெளிநாட்டு தத்தெடுப்புகளை சாத்தியமற்றதாக மாற்றக்கூடும் என்றும், பெரும்பாலான நேர்மையான தத்தெடுப்புகளை பாதிக்கக்கூடும் என்றும் இணை அமைச்சர் கோ போ மிங் முன்னதாக தெரிவித்திருந்தார். எனினும், வெளிநாடுகளில் இருந்து கொண்டு வரப்படும் குழந்தைகளின் பின்னணி மற்றும் பூர்வீகம் சரியாக இருப்பதை உறுதி செய்வது முக்கியம் என்றும் அவர் வலியுறுத்தினார்.
இதற்காக தத்தெடுப்பு நிறுவனங்களுக்கு தெளிவான வழிகாட்டுதல்கள் உருவாக்கப்பட்டுள்ளன. எந்த நடவடிக்கைகள் அனுமதிக்கப்படுகின்றன, எவை தடைசெய்யப்பட்டவை என்பதுடன், நிறுவனங்கள் மேற்கொள்ள வேண்டிய நடைமுறைகளும் பொறுப்புகளும் இதில் குறிப்பிடப்பட்டுள்ளன. அதேசமயம், தத்தெடுக்க விரும்பும் பெற்றோர்களும் உரிய பொறுப்புகளை ஏற்க வேண்டும் என அதிகாரிகள் தெரிவித்துள்ளனர்.
இந்த கடத்தல் வளையத்தில் ஈடுபட்டதாக சந்தேகிக்கப்படும் 12 பேர் கைது செய்யப்பட்டுள்ளதாக இந்தோனேசிய ஊடகங்கள் தகவல் வெளியிட்டுள்ளன. ஒவ்வொரு குழந்தையும் சிங்கப்பூருக்கு அனுப்புவதற்காக கோடிக்கணக்கான ரூபாய்க்கு விற்கப்பட்டதாகவும் தெரிவிக்கப்பட்டுள்ளது. இந்தோனேசிய குழந்தைகள் சிங்கப்பூருக்கு கடத்தப்பட்ட சம்பவங்கள் இதற்கு முன்பும் நடந்துள்ளதை அதிகாரிகள் நினைவூட்டியுள்ளனர்.
Follow us on : click here
Premium Job Link:https://www.sgtamilan.com/product/premium-member-ship
WHATSAPP CHANNEL LINK