ChatGPT மூலம் 14 வயது சிறுமியாக நடித்து $20,000 மோசடி..!!20 வயது இளைஞர் கைது..!!
சிங்கப்பூரில் 14 வயது சிறுமி போல நடித்து, 21 வயது இளைஞரிடம் இருந்து $20,000 பணத்தை மிரட்டிப் பறிக்க முயன்ற 20 வயது ஆன்டனி ஸு (Anthony Xu) கைது செய்யப்பட்டுள்ளார். இந்த வழக்கில் அவர் தனது குற்றத்தை நீதிமன்றத்தில் ஒப்புக்கொண்டுள்ளார்.
ஆன்டனி ஸு, இணையத்தில் ஒருவரை எவ்வாறு ஏமாற்றி பணம் பறிப்பது என்பது தொடர்பான யோசனைகளுக்காக ChatGPT மற்றும் Instagram போன்ற சமூக ஊடகங்களில் வெளியாகும் குறுங்காணொளிகளைப் பயன்படுத்தியதாக நீதிமன்றத்தில் தெரிவிக்கப்பட்டது.
இந்த மோசடித் திட்டத்திற்காக ஆன்டனி ஸு, ஒரு பெண்ணின் உதவியுடன் சமூக வலைதளத்தில் 14 வயது சிறுமி போலக் காட்டும் போலி கணக்கை உருவாக்கியுள்ளார்.
அந்தக் கணக்கு மூலம் 21 வயதான லாய் யூ ஹாங் (Lai Yu Hang) என்பவருடன் தொடர்பை ஏற்படுத்தியுள்ளார். அவருடன் இணையத்தில் உரையாடி, பின்னர் நேரில் சந்திக்கவும் ஏற்பாடு செய்துள்ளார்.
திட்டமிட்டபடி, லாய் யூ ஹாங் சந்திப்புக்காக MRT நிலையத்திற்கு வந்துள்ளார். அப்போது ஆன்டனி ஸு, தான் அந்த 14 வயது சிறுமியின் அண்ணன் எனக் கூறி அவரை எதிர்கொண்டதாக தெரிவிக்கப்பட்டுள்ளது.
அப்போது லாயிடம் இருந்து சில பொருட்களை எடுக்குமாறு மிரட்டியதுடன், அவரது அடையாள அட்டையையும் புகைப்படம் எடுத்ததாக நீதிமன்றத்தில் தெரிவிக்கப்பட்டது.
மேலும், இந்தச் சம்பவத்தை காவல்துறையிடம் தெரிவிப்பதாகவும், அவரது நற்பெயருக்கு பாதிப்பு ஏற்படும் வகையிலும் மிரட்டல் விடுக்கப்பட்டதாக கூறப்படுகிறது.
இதன் பின்னர், லாய் யூ ஹாங்கிடம் இருந்து $20,000 பணத்தை ஆன்டனி ஸு கேட்டுள்ளார்.
இந்தத் தொகையை ஒரே முறையில் செலுத்த வேண்டியதில்லை என்றும், ஐந்து ஆண்டுகளுக்கு மாதம் $300 வீதம் செலுத்தலாம் என்றும் அவர் கூறியதாக தெரிவிக்கப்பட்டுள்ளது.
மிரட்டலுக்கு உள்ளான லாய், மறுநாள் அதிகாலை $100 பணத்தை ஸுவிடம் கொடுத்துள்ளார்.
ஆனால், பின்னர் அந்த $100 தொகையை ஸு மீண்டும் லாயிடம் திருப்பிக் கொடுத்ததாகவும், அவரது தாயாரிடம் மன்னிப்புக் கேட்டு தகவல் அனுப்பியதாகவும் நீதிமன்றத்தில் தெரிவிக்கப்பட்டது.
இதற்கிடையில், லாய் யூ ஹாங் ஏற்கனவே இந்தச் சம்பவம் குறித்து சிங்கப்பூர் காவல்துறையில் புகார் அளித்திருந்தார். இதையடுத்து ஆன்டனி ஸு கைது செய்யப்பட்டார்.
இந்த வழக்கில் பணம் பறித்தல் மற்றும் ஏமாற்றுதல் தொடர்பான குற்றச்சாட்டுகளை அவர் நீதிமன்றத்தில் ஒப்புக்கொண்டுள்ளார்.
ChatGPT உள்ளிட்ட செயற்கை நுண்ணறிவு கருவிகளையும் சமூக ஊடகங்களையும் தவறான நோக்கத்திற்காக பயன்படுத்தி திட்டமிடப்பட்டதாக கூறப்படும் இந்தச் சம்பவம், சிங்கப்பூரில் கவனத்தை ஈர்த்துள்ளது.
இந்த வழக்கு ஆகஸ்ட் 13ஆம் தேதி மேலும் விசாரணைக்கு வருகிறது. ஆன்டனி ஸுவுக்கான தண்டனை விவரம் செப்டம்பர் 23ஆம் தேதி அறிவிக்கப்படும் எனத் தெரிவிக்கப்பட்டுள்ளது.
Follow us on : click here
Premium Job Link:https://www.sgtamilan.com/product/premium-member-ship
WHATSAPP CHANNEL LINK