சிங்கப்பூரில் மருத்துவமனையில் 52 வயது நபர் மரணம்..!! மருத்துவ அலட்சியமா? மகள் பரபரப்பு குற்றச்சாட்டு..!!

சிங்கப்பூரில் மருத்துவமனையில் 52 வயது நபர் மரணம்..!! மருத்துவ அலட்சியமா? மகள் பரபரப்பு குற்றச்சாட்டு..!!

சிங்கப்பூரில் எட்டு நாட்களாகத் தொடர்ந்து காய்ச்சலால் அவதிப்பட்டு வந்த 52 வயது ஆண் ஒருவர், கூ டெக் புவாட் மருத்துவமனையில் சிகிச்சை பெற்று வந்த நிலையில் மாரடைப்பு ஏற்பட்டு உயிரிழந்த சம்பவம் பரபரப்பை ஏற்படுத்தியுள்ளது. தனது தந்தையின் உடல்நிலை மோசமடைந்ததற்கு மருத்துவமனையின் சிகிச்சை முறையே காரணம் என்று அவரது மகள் குற்றம் சாட்டியுள்ளார். இதற்குப் பதிலளித்த மருத்துவமனை, நோயாளிக்கு உரிய மருத்துவக் கவனிப்பு வழங்கப்பட்டதாகக் கூறி குற்றச்சாட்டுகளை மறுத்துள்ளது.

இறந்தவரின் மகள் கின்னூ தோ, கடந்த செவ்வாய்க்கிழமை (நவம்பர் 17) தனது முகநூல் பக்கத்தில் தந்தையின் மரணம் தொடர்பான நிகழ்வுகளைப் பதிவிட்டிருந்தார்.

அதன்படி, தொடர்ந்து எட்டு நாட்களாகக் காய்ச்சல் இருந்ததால், செப்டம்பர் 24ஆம் தேதி தனது தந்தை கூ டெக் புவாட் மருத்துவமனையில் அனுமதிக்கப்பட்டதாக அவர் தெரிவித்துள்ளார். தனது தந்தைக்கு நீண்டகாலமாக மதுப்பழக்கம் இருந்ததையும், உடலில் மது இருந்ததையும் காரணமாகக் காட்டி நுண்ணுயிர் எதிர்ப்பி மருந்துகளை வழங்குவதில் மருத்துவமனை தாமதம் செய்ததாகவும் அவர் குற்றம் சாட்டினார்.

மருத்துவமனையில் இருந்தபோது அவரது தந்தைக்குத் தொடர்ந்து காய்ச்சல் ஏற்பட்டதுடன், மதுப்பழக்கத்திலிருந்து விலகுவதால் ஏற்படும் பிரமைகள் உள்ளிட்ட அறிகுறிகளும் காணப்பட்டன. இதனால் அவர் அடிக்கடி படுக்கையை விட்டு எழுந்திருக்க முயன்றதால், மருத்துவ ஊழியர்கள் அவருக்கு மயக்க மருந்துகளை வழங்கியதாக மகள் குறிப்பிட்டுள்ளார்.

செப்டம்பர் 26ஆம் தேதி, தனது தந்தை வழக்கத்திற்கு மாறாக மிகவும் சோர்வாகக் காணப்பட்டதாகவும், அவரை எழுப்புவதற்கே சிரமமாக இருந்ததாகவும் மகள் தெரிவித்துள்ளார். இதுகுறித்து மருத்துவ ஊழியர்களிடம் கேட்டபோது, மயக்க மருந்தின் இயல்பான எதிர்வினைதான் இது என்று செவிலியர் விளக்கியதாகக் கூறினார்.

மருத்துவ ஊழியர்களின் தொழில்முறை முடிவை நம்பியதால், குடும்பத்தினர் அதற்கு மேல் எதுவும் கேட்கவில்லை என்றும், தெளிவான மனநிலையில் தந்தையுடன் பேசியது அதுவே கடைசித் தருணமாக இருக்கும் என்று எதிர்பார்க்கவில்லை என்றும் அவர் வேதனையுடன் தெரிவித்துள்ளார்.

செப்டம்பர் 27ஆம் தேதி அதிகாலை சுமார் 3 மணியளவில், தனது தந்தைக்கு மாரடைப்பு ஏற்பட்டதாகவும், அவர் தீவிர சிகிச்சைப் பிரிவுக்கு மாற்றப்பட்டுள்ளதாகவும் மருத்துவமனையிலிருந்து குடும்பத்தினருக்குத் தகவல் கிடைத்துள்ளது.

மருத்துவமனையின் தகவலின்படி, அதிகாலை 1:30 மணியளவில் செவிலியர் அவரது தந்தையின் இரத்த அழுத்தத்தைப் பரிசோதித்துள்ளார். பின்னர் அதிகாலை 2:15 மணியளவில் அவர் சுவாசிக்கவில்லை என்பது கண்டறியப்பட்டது. இதனால், அந்த இடைப்பட்ட நேரத்தில் தனது தந்தையின் உடல்நிலை மோசமடைந்ததை மருத்துவமனை சரியான நேரத்தில் கவனித்ததா என்ற கேள்வியை மகள் எழுப்பியுள்ளார்.

முதலுதவி மற்றும் உயிர்மீட்பு சிகிச்சைக்குப் பிறகு இதயத்துடிப்பு சீரடைந்தபோதிலும், அவர் சுயநினைவின்றி இருந்தார். தொடர்ந்து மேற்கொள்ளப்பட்ட பரிசோதனைகளில் ஆக்சிஜன் பற்றாக்குறையால் கடுமையான மூளைப் பாதிப்பும், பல்வேறு உறுப்புகள் செயலிழந்ததும் தெரியவந்தது.

இதையடுத்து, அக்டோபர் 4ஆம் தேதி குடும்பத்தினர் செயற்கை சுவாசக் கருவியை அகற்ற முடிவு செய்தனர். இதன் பின்னர் அந்த நபர் உயிரிழந்தார்.

தந்தையின் உடல்நிலை குறித்து விளக்கிய சில மருத்துவர்களின் பேச்சில் பரிவுணர்வு இல்லை என்றும் மகள் குற்றம் சாட்டியுள்ளார்.

தனது தந்தை கண்விழித்தாலும் சடலம் போன்ற நிலையில்தான் இருப்பார் என்றும், அவர் கண்விழிக்காமல் இருப்பதே நல்லது என்றும் மருத்துவர் ஒருவர் கூறியதாக அவர் தெரிவித்துள்ளார். தந்தை மீண்டும் கண்விழிப்பார் என்ற நம்பிக்கையில் இருந்த தனக்கு இதுபோன்ற வார்த்தைகள் மிகுந்த மனவேதனையை ஏற்படுத்தியதாகவும் குறிப்பிட்டுள்ளார்.

இந்தச் சம்பவம் குறித்து மருத்துவமனையிடமிருந்து முறையான விளக்கம் கிடைக்க வேண்டும் என்பதற்காகவே பொதுவெளியில் பதிவிட்டதாகவும், மருத்துவச் சிகிச்சையில் அலட்சியம் கண்டறியப்பட்டால் அதற்குப் பொறுப்பேற்று, எதிர்காலத்தில் இதுபோன்ற சம்பவங்கள் நடைபெறாமல் தடுக்க வேண்டும் என்றும் அவர் வலியுறுத்தியுள்ளார்.

இந்தக் குற்றச்சாட்டுகளுக்குப் பதிலளித்து, கூ டெக் புவாட் மருத்துவமனை நவம்பர் 20ஆம் தேதி இரவு தனது முகநூல் பக்கத்தில் விளக்கமளித்தது.

அந்த நபர் குறிப்பிடத்தக்க அளவில் உடல் எடை குறைந்திருந்ததால் அவசர சிகிச்சைப் பிரிவில் மருத்துவ உதவியை நாடியதாகவும், மருத்துவமனையில் அனுமதிக்கப்பட்ட பின்னர் அவருக்குக் காய்ச்சல் மற்றும் மதுப்பழக்க விலகல் அறிகுறிகள் ஏற்பட்டதாகவும் மருத்துவமனை தெரிவித்தது.

மேலும், அவர் மருத்துவமனையில் அனுமதிக்கப்பட்ட அன்றே நுண்ணுயிர் எதிர்ப்பி மருந்துகள் வழங்கப்பட்டதாகவும், அவரது உடலில் மது இருந்ததால் மருந்து வழங்குவதில் எந்தத் தாமதமும் ஏற்படவில்லை என்றும் தெளிவுபடுத்தியது.

நோயாளி 45 நிமிடங்கள் மருத்துவக் கண்காணிப்பின்றி இருந்ததாகக் கூறப்படும் குற்றச்சாட்டையும் மருத்துவமனை மறுத்துள்ளது.

செப்டம்பர் 27ஆம் தேதி அதிகாலை 1:40 மணிக்கு செவிலியர்கள் அவருக்குக் கழிப்பறைக்குச் செல்ல உதவியதாகவும், அதிகாலை 1:56 மணிக்கு மீண்டும் படுக்கைக்கு அழைத்துச் சென்று ஓய்வெடுக்கச் செய்ததாகவும் சிசிடிவி காட்சிகள் மூலம் தெரியவந்ததாக மருத்துவமனை குறிப்பிட்டுள்ளது.

பின்னர் அதிகாலை 2:15 மணிக்கு மருத்துவப் பணியாளர் ஒருவர் அவரது வார்டுக்குள் சென்றபோது, அவர் சுயநினைவின்றி இருப்பதைக் கண்டறிந்ததாகவும், உடனடியாக உயிர்மீட்பு சிகிச்சை தொடங்கப்பட்டு தீவிர சிகிச்சைப் பிரிவுக்கு மாற்றப்பட்டதாகவும் மருத்துவமனை விளக்கியுள்ளது.

மருத்துவரின் பேச்சில் பரிவுணர்வு இல்லை என்ற குற்றச்சாட்டு குறித்தும் மருத்துவமனை விளக்கமளித்துள்ளது.

நோயாளியின் மூளைக் காயம், குணமடைவதற்கான வாய்ப்புகள் மற்றும் சிகிச்சை முறைகள் குறித்து மருத்துவக் குழுவினர் குடும்பத்தினருக்கு விளக்கியதாகவும், வழங்கப்பட்ட மருத்துவ ஆலோசனைகள் அவரது உடல்நிலைக்கு ஏற்றதாக இருந்ததாகவும் தெரிவித்தது.

இருப்பினும், மருத்துவரின் கருத்துகளால் குடும்பத்தினர் தவறாகப் புரிந்துகொள்ளப்பட்டதாக உணர்ந்திருந்தால் அதற்காக வருத்தம் தெரிவிப்பதாகவும், மன்னிப்புக் கோருவதாகவும் மருத்துவமனை குறிப்பிட்டுள்ளது.

மருத்துவமனையில் அனுமதிக்கப்பட்டிருந்த காலத்தில் அந்த நபருக்கு முறையான மருத்துவக் கவனிப்பு வழங்கப்பட்டதாகவும், சிகிச்சைத் திட்டம் குறித்து குடும்பத்தினருக்கு பலமுறை விளக்கமளிக்கப்பட்டதுடன், குடும்பச் சந்திப்புகள் மற்றும் மனரீதியான ஆதரவும் வழங்கப்பட்டதாகவும் மருத்துவமனை வலியுறுத்தியுள்ளது.

அந்த நேரத்தில் குடும்பத்தினர் தீர்க்கப்படாத பிரச்சினைகள் எதையும் தங்களிடம் தெரிவிக்கவில்லை என்றும், மகள் முகநூலில் பதிவிட்ட பின்னரே அவரது கவலைகள் மீண்டும் தங்களுக்குத் தெரியவந்ததாகவும் தெரிவித்துள்ளது.

மேலும், விசாரணை முடிவுகள் குறித்து விளக்குவதற்காகக் குடும்பச் சந்திப்பை ஏற்பாடு செய்ய கடந்த மூன்று நாட்களாக மகளைப் பலமுறை தொடர்புகொள்ள முயன்றும் முடியவில்லை என்றும் மருத்துவமனை கூறியுள்ளது.

இறுதியாக, உயிரிழந்த நபரின் குடும்பத்தினருக்கு ஆழ்ந்த இரங்கலையும் அனுதாபங்களையும் தெரிவித்த மருத்துவமனை, குடும்பத்தினரின் கேள்விகளுக்குப் பதிலளிக்கவும், இந்தச் சம்பவம் தொடர்பாக மேலும் விளக்கமளிக்கவும் தயாராக இருப்பதாகத் தெரிவித்துள்ளது.

ஒருபுறம் மருத்துவமனை மீது மகள் சுமத்தியுள்ள குற்றச்சாட்டுகளும், மறுபுறம் மருத்துவமனை அளித்துள்ள விளக்கமும் சிங்கப்பூரில் கவனத்தை ஈர்த்துள்ளன.