இனி வேகமாக வாகனம் ஓட்டினால் கடும் அபராதம் – ஜனவரி முதல் புதிய நடைமுறை

சிங்கப்பூர்:சிங்கப்பூரில் வேகமாக வாகனம் ஓட்டுவோருக்கு எதிராக கடும் நடவடிக்கைகள் மேற்கொள்ளப்பட உள்ளன. அடுத்த ஆண்டு ஜனவரி 1 முதல், வேக மீறல்களில் ஈடுபடும் ஓட்டுநர்களின் உரிமங்களில் இருந்து அதிக குறைபாடு புள்ளிகள் கழிக்கப்படுவதுடன், அபராதங்களும் உயர்த்தப்படவுள்ளதாக உள்துறை அமைச்சகம் அறிவித்துள்ளது.

இந்த ஆண்டு மே 28 ஆம் தேதி அறிவிக்கப்பட்ட இந்த புதிய அபராத மாற்றங்கள், 2026 ஜனவரியில் அமலுக்கு வரும். புதிய விதிகளின்படி, மணிக்கு 20 கிலோமீட்டர் அல்லது அதற்கும் குறைவாக வேகத்தை மீறி வாகனம் ஓட்டினால், குறைபாடு புள்ளிகள் 4ல் இருந்து 6 ஆக உயர்த்தப்படும். அதேபோல், 50 முதல் 60 கிலோமீட்டர் வரை வேகமாக ஓட்டினால், குறைபாடு புள்ளிகள் 18ல் இருந்து 24 ஆக அதிகரிக்கப்படும். இத்தகைய கடுமையான மீறல்களில் ஈடுபடுவோர் நீதிமன்றத்திற்கு ஆஜர்படுத்தப்படுவார்கள்.