சிங்கப்பூரில் பச்சிளம் குழந்தைக்கு நேர்ந்த கொடூரம்..!! பணிப்பெண்ணின் அதிர்ச்சி செயல் அம்பலம்..!!

சிங்கப்பூரில் பச்சிளம் குழந்தைக்கு நேர்ந்த கொடூரம்..!! பணிப்பெண்ணின் அதிர்ச்சி செயல் அம்பலம்..!!

சிங்கப்பூரில் 6 மாதக் குழந்தையைப் பராமரித்து வந்த 24 வயதான பர்மிய வீட்டுப் பணிப்பெண், அக்குழந்தையைத் தொடர்ந்து கொடூரமாகத் துன்புறுத்திய வழக்கில் தனது குற்றத்தை நீதிமன்றத்தில் ஒப்புக்கொண்டுள்ளார். குழந்தையைப் பலமாக உலுக்கியது, சரமாரியாக அறைந்தது மட்டுமின்றி, உடலில் பல இடங்களில் கடித்தும் துன்புறுத்திய சம்பவம் பெரும் அதிர்ச்சியை ஏற்படுத்தியுள்ளது.

குழந்தையின் பெற்றோர், பணிப்பெண்ணை நம்பி குழந்தையைத் தனியாகப் பராமரிக்கும் பொறுப்பை ஒப்படைத்திருந்தனர். இந்நிலையில், இந்த ஆண்டு ஏப்ரல் 2ஆம் தேதி முதல் 19ஆம் தேதி வரை, பெரும்பாலும் நள்ளிரவு நேரங்களில் குழந்தை பல்வேறு வகைகளில் துன்புறுத்தப்பட்டுள்ளது. குழந்தையின் தலை மற்றும் கழுத்துக்குப் போதிய ஆதரவு அளிக்காமல் முரட்டுத்தனமாகத் தூக்கியதுடன், சில நேரங்களில் ஒற்றைக் கையால் மட்டுமே தூக்கியுள்ளார்.

மேலும், குழந்தையை முன்னும் பின்னுமாகப் பலமாக உலுக்கியதுடன், வாயில் பாசிஃபையரை வலுக்கட்டாயமாகத் திணித்தும், கன்னங்களைக் கடுமையாகக் கிள்ளியும் துன்புறுத்தியுள்ளார். ஒரு சந்தர்ப்பத்தில் குழந்தையை மெத்தையில் அழுத்திப் பிடித்து தொடர்ச்சியாக மூன்று முறை பலமாக அறைந்துள்ளார். இந்த அறைகளின் சத்தம் சிசிடிவி கேமராவில் பதிவாகும் அளவுக்கு இருந்துள்ளது.

மற்றொரு சம்பவத்தில், குழந்தை எழுப்பிய சத்தத்தால் தூக்கத்திலிருந்து எழுந்த பணிப்பெண், குழந்தையின் தலையில் பலமாக அறைந்ததுடன், தனது விரல்களை அவனது வாயில் விட்டு, பின்னர் தூக்கி உலுக்கியுள்ளார்.
மேலும், விரல் முட்டுகளால் குழந்தையின் தலையில் தட்டியதுடன், நெற்றி, அக்குள் மற்றும் இடுப்புப் பகுதிகளிலும் தாக்கியுள்ளார். குறிப்பாக, குழந்தையின் அக்குள் மற்றும் இடுப்புப் பகுதிகளில் கடித்துள்ளார். இதனால் குழந்தை வலியால் சத்தமாக அழுதுள்ளது. இதுமட்டுமின்றி, குழந்தையை மெத்தையின் மீது தூக்கி எறிந்தும், மீண்டும் மீண்டும் உலுக்கியுமுள்ளார்.

இந்த ஆண்டு ஏப்ரல் 19ஆம் தேதி, வீட்டில் பொருத்தப்பட்டிருந்த சிசிடிவி காட்சிகளைப் பார்த்த குழந்தையின் தாய், தனது குழந்தை பணிப்பெண்ணால் கொடூரமாகத் துன்புறுத்தப்பட்டிருப்பதைக் கண்டு அதிர்ச்சியடைந்தார். உடனடியாகக் கணவருக்குத் தகவல் தெரிவித்த அவர், பின்னர் காவல்துறையையும் அழைத்தார்.

இதையடுத்து, குழந்தை கேகே மகளிர் மற்றும் குழந்தைகள் மருத்துவமனைக்கு அழைத்துச் செல்லப்பட்டுப் பரிசோதிக்கப்பட்டது. அப்போது, குழந்தையின் முழங்கைக்கு அருகில் சுமார் 2 செ.மீ. × 1 செ.மீ. அளவிலான இரண்டு கடி காயங்களும், காலில் சுமார் 7 செ.மீ. நீளமுள்ள சிராய்ப்புக் காயமும் இருப்பது கண்டறியப்பட்டது.

குழந்தையின் மருத்துவச் செலவுகளுக்காகப் பெற்றோர் S$172.50 செலுத்தியுள்ளனர். ஆனால், குற்றம் சாட்டப்பட்ட பணிப்பெண் இதுவரை எந்தவித இழப்பீடும் வழங்கவில்லை.

இந்த வழக்கில் பாதிக்கப்பட்ட குழந்தை மற்றும் குடும்பத்தினரின் பாதுகாப்பைக் கருத்தில் கொண்டு, அவர்களின் பெற்றோர் மற்றும் பணிப்பெண்ணின் பெயர்களை ஊடகங்கள் வெளியிட நீதிமன்றம் தடை விதித்துள்ளது.

மேலும், சம்பவம் தொடர்பான சிசிடிவி காட்சிகள் நீதிமன்றத்தில் சமர்ப்பிக்கப்பட்டுள்ளன. அவற்றைத் திரையிட வேண்டிய அவசியமில்லை என அரசுத் தரப்பும், எதிர்த் தரப்பும் தெரிவித்துள்ளன.

24 வயதான பர்மிய பணிப்பெண், குழந்தை துஷ்பிரயோகம் தொடர்பான ஒரு குற்றச்சாட்டை நேற்று (நவம்பர் 18) நீதிமன்றத்தில் ஒப்புக்கொண்டார். அவருக்கு 24 முதல் 30 மாதங்கள் வரை சிறைத் தண்டனை விதிக்க அரசுத் தரப்பு பரிந்துரைத்துள்ளது.

இந்நிலையில், குற்றவாளிக்கான தண்டனை விவரங்களை இறுதி செய்வதற்காக வழக்கு வரும் ஜனவரி மாதத்திற்கு ஒத்திவைக்கப்பட்டுள்ளது

பெற்றோர் முழு நம்பிக்கையுடன் ஒப்படைத்த பச்சிளம் குழந்தைக்கு நேர்ந்த இந்தக் கொடூரம் சிங்கப்பூரில் பெரும் அதிர்ச்சியை ஏற்படுத்தியுள்ளது. குழந்தைகளைப் பராமரிக்கும் பொறுப்பில் இருப்பவர்களின் செயல்பாடுகளைக் கண்காணிப்பது எவ்வளவு முக்கியம் என்பதையும் இந்தச் சம்பவம் மீண்டும் உணர்த்தியுள்ளது.