சிங்கப்பூரில் 277 பேர் சிக்கினர்..! S$6.1 மில்லியன் மோசடி அம்பலம்!
சிங்கப்பூரில் மோசடிக் குற்றங்களில் ஈடுபட்டதாகச் சந்தேகிக்கப்படும் 277 பேரிடம் காவல்துறை விசாரணை நடத்தி வருகிறது. இவர்களுடன் தொடர்புடைய 883-க்கும் மேற்பட்ட மோசடிச் சம்பவங்களில் பாதிக்கப்பட்டவர்கள் சுமார் S$6.1 மில்லியனை இழந்துள்ளதாக முதற்கட்ட விசாரணையில் தெரியவந்துள்ளது.
சிங்கப்பூர் முழுவதும் அக்டோபர் 8 முதல் 21ஆம் தேதி வரை இரண்டு வாரங்களாகக் காவல்துறையினர் அதிரடி நடவடிக்கையை மேற்கொண்டனர். சைபர் கமாண்ட் பிரிவு மற்றும் ஏழு காவல் பிரிவுகளைச் சேர்ந்த அதிகாரிகள் இந்த நடவடிக்கையில் ஈடுபட்டனர்.
இதில் 186 ஆண்கள் மற்றும் 91 பெண்கள் என மொத்தம் 277 பேர் விசாரணைக்கு உதவி வருகின்றனர். அவர்களின் வயது 15 முதல் 76 வரை இருப்பதாகக் காவல்துறை தெரிவித்துள்ளது.
விசாரணையில் உள்ளவர்களுக்குத் தொடர்பு இருப்பதாகச் சந்தேகிக்கப்படும் மோசடிகளில் பல்வேறு வகையான குற்றங்கள் இடம்பெற்றுள்ளன. அவற்றில்:
👉இணையவழிப் பொருள் விற்பனை மோசடி
👉போலியான இணைய இணைப்புகள் மூலம் தகவல்களைத் திருடும் மோசடி
👉வேலைவாய்ப்பு மோசடி
👉அரசாங்க அதிகாரிகளைப் போல ஆள்மாறாட்டம் செய்யும் மோசடி
👉முதலீட்டு மோசடி
👉அதிர்ஷ்டக் குலுக்கல் பரிசு மோசடி
ஆகியவை அடங்கும்.இந்தச் சம்பவங்களால் பாதிக்கப்பட்டவர்கள் சுமார் S$6.1 மில்லியனை இழந்துள்ளதாக முதற்கட்ட விசாரணை தெரிவிக்கிறது.
மோசடிக்காரர்களுக்கு உதவும் வகையில் மற்றவர்களின் பணத்தைப் பரிமாற்றம் செய்வது, வங்கிக் கணக்குகளைப் பயன்படுத்த அனுமதிப்பது, சிம் அட்டைகள் அல்லது Singpass உள்நுழைவு விவரங்களை வழங்குவது போன்ற செயல்களும் கடுமையான விளைவுகளை ஏற்படுத்தக்கூடும்.
இந்த வழக்குகளில் தொடர்புடையவர்கள் ஏமாற்றுதல், பணமோசடி அல்லது உரிமமின்றிப் பணப் பரிவர்த்தனைச் சேவைகளை வழங்குதல் போன்ற குற்றச்சாட்டுகளின் கீழ் விசாரிக்கப்படுகின்றனர்.
சிங்கப்பூர் சட்டத்தின்படி, ஏமாற்றுதல் குற்றத்திற்கு அதிகபட்சம் 10 ஆண்டுகள் சிறைத்தண்டனையும் அபராதமும் விதிக்கப்படலாம். பணமோசடி குற்றத்திற்கு அதிகபட்சம் 10 ஆண்டுகள் சிறைத்தண்டனை, S$500,000 வரை அபராதம் அல்லது இரண்டும் விதிக்கப்படலாம்.
உரிமமின்றிப் பணப் பரிவர்த்தனைச் சேவைகளை வழங்கும் குற்றத்திற்கு S$125,000 வரை அபராதம், மூன்று ஆண்டுகள் வரை சிறைத்தண்டனை அல்லது இரண்டும் விதிக்கப்படலாம்.
மேலும், மோசடிக்காரர்கள் மற்றும் மோசடிக் கும்பல்களின் உறுப்பினர்கள் அல்லது ஆட்சேர்ப்பாளர்களுக்கு 6 முதல் 24 பிரம்படிகள் வரை கட்டாயமாக விதிக்கப்படலாம். மோசடிப் பணத்தைச் சலவை செய்யவும், சிம் அட்டைகள் அல்லது Singpass விவரங்களை வழங்கவும் உதவும் பணக் கடத்தல்காரர்களுக்கு (Money Mules) அதிகபட்சம் 12 பிரம்படிகள் வரை விதிக்கப்படலாம்.
மோசடிகளுக்குத் துணைபோகும் நபர்களைத் தடுக்க, குறிப்பிட்ட சூழ்நிலைகளில் அவர்களின் வங்கிச் சேவைகள் மற்றும் கைப்பேசி இணைப்புகளைப் பயன்படுத்துவதற்குக் கட்டுப்பாடுகள் விதிக்கப்படலாம் எனக் காவல்துறை எச்சரித்துள்ளது.
மோசடிகளுடன் தொடர்புடையவர்கள் எனக் கண்டறியப்படும் நபர்கள் மீது உரிய நடவடிக்கை எடுக்கப்படும் என்றும் காவல்துறை வலியுறுத்தியுள்ளது.
பொதுமக்கள் எச்சரிக்கை: எளிதில் பணம் சம்பாதிக்கலாம் என்ற ஆசையில் தெரியாத நபர்களுக்கு வங்கிக் கணக்கு, சிம் அட்டை அல்லது Singpass விவரங்களை வழங்க வேண்டாம். இத்தகைய செயல்கள் மோசடிக் குற்றங்களில் உங்களையும் சிக்கவைக்கக்கூடும்.
Follow us on :
Premium Job Link:https://www.sgtamilan.com/product/premium-member-ship
WHATSAPP CHANNEL LINK