வாக்குறுதியில் இருந்து பின்வாங்கியதால் $7 மில்லியன் இழப்பீடு..! சிங்கப்பூர் நீதிமன்றம் அதிரடி தீர்ப்பு..!!
சிங்கப்பூரில் ஊழியர் தங்குவிடுதி உள்ளிட்ட சொத்துகள் தொடர்பான நிறுவனப் பங்குகளை வாங்குவதாக அளித்த வாக்குறுதியிலிருந்து பின்வாங்கிய வர்த்தகர் ஒருவர், S$7.01 மில்லியன் (சுமார் S$7 மில்லியன்) இழப்பீடு வழங்க வேண்டும் என்று உயர் நீதிமன்றம் உத்தரவிட்டுள்ளது.
இந்த வழக்கு, உட்லண்ட்ஸ் தொழில்துறைப் பூங்காவில் உள்ள வெளிநாட்டு ஊழியர் தங்குவிடுதி உள்ளிட்ட சொத்துகளுக்கு உரிமை கொண்டிருந்த கூன் செங் டெவலப்மென்ட் நிறுவனத்தின் விற்பனை தொடர்பானது.
ஊன் கூன் செங் என்பவருக்குச் சொந்தமான சின் ஹோங் ஹுவா நிறுவனத்தின் கீழ் இந்த நிறுவனம் இருந்தது. கடந்த 2015ஆம் ஆண்டு நடைபெற்ற விற்பனைப் பரிவர்த்தனையின்போது இந்த சர்ச்சை உருவானது.
சம்பந்தப்பட்ட ஊழியர் தங்குவிடுதியில் 320 ஊழியர்களை மட்டுமே தங்கவைக்க அனுமதி இருந்தது. ஆனால், அங்கு கிட்டத்தட்ட 500 ஊழியர்கள் தங்கியிருந்தனர்.
தங்குவிடுதியில் அனுமதிக்கப்பட்ட எண்ணிக்கையை விட அதிகமானோர் தங்கியிருந்தது, பரிவர்த்தனையில் ஈடுபட்டவர்களுக்கு தெரிந்திருந்ததாக நீதிபதி முகம்மது ஃபைஸால் தனது தீர்ப்பில் குறிப்பிட்டுள்ளார்.
மேலும், அதிகமான ஊழியர்கள் தங்கியிருந்ததால் அந்தத் தங்குவிடுதி வர்த்தக ரீதியாக அதிக லாபம் ஈட்டக்கூடியதாக இருந்ததாகவும் நீதிபதி தெரிவித்துள்ளார்.
பரிவர்த்தனையின் ஒரு பகுதியாக, ஊன் பெற்ற பங்குகளை வாங்குவதாக லீ ஹுவா என்ற வர்த்தகர் உறுதியளித்திருந்தார்.
ஆனால், பின்னர் அந்த வாக்குறுதியிலிருந்து அவர் பின்வாங்கினார். இந்தப் பரிவர்த்தனை சட்டபூர்வமானது அல்ல என்றும், சம்பந்தப்பட்ட தங்குவிடுதியில் அனுமதிக்கப்பட்ட அளவை விட அதிகமான ஊழியர்கள் தங்கியிருந்ததால் அதன் நம்பகத்தன்மை பாதிக்கப்பட்டதாகவும் அவர் வாதிட்டார். ஆனால், லீ ஹுவாவின் வாதத்தை சிங்கப்பூர் உயர் நீதிமன்றம் நிராகரித்தது.
வணிக ரீதியாக தனக்குச் சாதகமாக இருந்தபோது ஒரு ஒப்பந்தத்தை ஏற்றுக்கொண்ட ஒருவர், பின்னர் அதன் மதிப்பு குறைந்துவிட்டதாகக் கூறி அதிலிருந்து விலக முடியாது என்று நீதிபதி முகம்மது ஃபைஸால் குறிப்பிட்டார்.
இதையடுத்து, ஊன் கூன் செங்கிற்கு S$7,013,157.95 இழப்பீடாக வழங்குமாறு லீ ஹுவாவுக்கு நீதிமன்றம் உத்தரவிட்டது.
இந்தத் தீர்ப்பு, வணிக ஒப்பந்தங்களில் ஒருதரப்பு தனக்கு சாதகமான அம்சங்களை மட்டும் ஏற்றுக்கொண்டு, பின்னர் சாதகமற்ற சூழல் ஏற்பட்டதும் தனது வாக்குறுதியிலிருந்து பின்வாங்க முடியாது என்பதையும் தெளிவுபடுத்தியுள்ளது.
Follow us on : click here
Premium Job Link:https://www.sgtamilan.com/product/premium-member-ship
WHATSAPP CHANNEL LINK