சிங்கப்பூரில் வெள்ள அபாயத்தை தடுக்க மேற்கொள்ளப்படும் மாபெரும் திட்டம்..!!!
சிங்கப்பூர்:சிங்கப்பூர் நகர-கிழக்கு கடற்கரையின் முதல் ஆய்வு நிறைவடைந்ததைத் தொடர்ந்து, பொதுப் பயன்பாட்டு வாரியம் (PUB) தெற்கு கடற்கரை மற்றும் சாங்கிக்கான விரிவான கடலோரப் பாதுகாப்புத் திட்டங்களை அறிவித்துள்ளது. காலநிலை மாற்றத்தால் கடல் மட்டம் அதிகரிக்கும் அபாயத்தை சமாளிக்க 2030 முதல் இந்த நடவடிக்கைகள் நடைமுறைப்படுத்தப்படவுள்ளன.
கடல் மட்ட உயர்வு அபாயம்
ஆய்வுகளின்படி, 2100ஆம் ஆண்டுக்குள் சிங்கப்பூர் கடல் மட்டம் 1.15 மீட்டர் உயரக்கூடும். மேலும் புயல்கள் மற்றும் அதிக அலைகளுடன் சேரும்போது, கடல் மட்டம் சராசரியாக 5 மீட்டர் வரை உயர்வதற்கான வாய்ப்பு உள்ளது. போதுமான பாதுகாப்பு இல்லாமல், சிங்கப்பூரின் நிலப்பரப்பின் மூன்றில் ஒரு பங்கு வெள்ளத்தால் ஆபத்தில் சிக்கக்கூடும்.
அரசின் பார்வை
துணைப் பிரதமர் மற்றும் வர்த்தக, தொழில்துறை அமைச்சர் கான் கிம் யோங், விவோசிட்டியில் நடைபெற்ற கடலோரப் பாதுகாப்பு கண்காட்சியில் பேசியபோது,“பெரிய நாடுகளைப் போல உள்நாட்டிற்கு பின்வாங்க முடியாது.எனவே எங்கள் கடற்கரையை பாதுகாப்பது மிக முக்கியம்” என்று வலியுறுத்தினார்.
தெற்கு கடற்கரைக்கான திட்டம்
💠 மூன்று கடலோரப் பாதுகாப்புச் சுவர்கள் கட்டப்படுகின்றன.
💠 வாயில்கள் வழியாக இயற்கை நீர்பாய்ச்சல் அனுமதிக்கப்படும்.
💠 சிங்கப்பூர், புலாவ் பிரானி மற்றும் சென்டோசா இடையிலான இணைப்பு மேம்படுத்தப்படும்.
💠 மெரினா தெற்கில் தற்போதைய தடுப்புச் சுவர்கள் உயர்த்தப்படும்.
💠 கடற்கரை புதுப்பிப்பு மேற்கொள்ளப்படும்.
சாங்கிக்கான திட்டம்
🔶️ அலை வாயில்கள், வெள்ளக் கரைகள், தடுப்புகள் நிறுவப்படும்.
🔶️ சாங்கி கடற்கரை பூங்கா அணைக்கட்டு உயர்த்தப்பட்டு நடைபாதை மற்றும் சைக்கிள் பாதையாக மாற்றப்படும்.
🔶️ பொழுதுபோக்கு இடங்களையும் இயற்கை வாழ்விடங்களையும் பாதுகாக்கும் வகையில் நடவடிக்கைகள் வடிவமைக்கப்படும்.
பொது ஆலோசனை மற்றும் அடுத்தடுத்த படிகள்
கடந்த மூன்று ஆண்டுகளில் 150க்கும் மேற்பட்ட பங்குதாரர்கள், நிபுணர்கள், சமூகக் குழுக்கள் மற்றும் பொதுமக்கள் ஆலோசனையில் பங்கேற்றுள்ளனர். இனி சுற்றுச்சூழல் தாக்க மதிப்பீடுகள் மற்றும் விரிவான பொறியியல் வடிவமைப்புகள் மேற்கொள்ளப்படும்.
முழுமையான பாதுகாப்பு வரிசை
இத்திட்டங்கள், கிழக்கு கடற்கரையில் அறிவிக்கப்பட்ட “லாங் தீவு” நில மீட்பு திட்டத்துடன் இணைந்து, சிங்கப்பூரை முழுமையான பாதுகாப்பு கோட்டுடன் இணைக்கின்றன.
எதிர்கால திட்டங்கள்:
சென்டோசா மற்றும் தென்மேற்கு கடற்கரைக்கான ஆய்வுகள் 2026 இல் தொடங்க உள்ளன. கூடுதலாக, பாசிர் பஞ்சாங் மின் நிலையம், கெப்பல் கிளப் மற்றும் மவுண்ட் ஃபேபர் போன்ற பகுதிகள் அடுத்த 5–10 ஆண்டுகளில் மறுவடிவமைக்கப்படும்.