சிங்கப்பூரில் மோட்டார் சைக்கிள் மீது மோதிவிட்டு தப்பிய BMW கார்..! இருவருக்குக் காயம்!
சிங்கப்பூரின் செம்பவாங் பகுதியில், மோட்டார் சைக்கிள் மீது மோதிவிட்டு நிற்காமல் சென்ற கருப்பு நிற BMW காரின் ஓட்டுநரைப் பிடிக்கக் காவல்துறையினர் விசாரணை நடத்தி வருகின்றனர்.
இந்தச் சம்பவம் அக்டோபர் 21ஆம் தேதி காலை சுமார் 8:30 மணியளவில், அட்மிரல்டி ரோடு ஈஸ்ட் சாலையில், யீஷூன் அவென்யூ 8 நோக்கிச் செல்லும் வழியில் நிகழ்ந்தது.
சமூக ஊடகத்தில் வெளியான வாகனப் பதிவுக் காணொளியின்படி, போக்குவரத்து விளக்கு பச்சை நிறமாக மாறியதைத் தொடர்ந்து, கருப்பு நிற BMW கார் வலதுபுறப் பாதைக்கு மாற முயன்றபோது, அப்பாதையில் சென்ற மோட்டார் சைக்கிள் மீது மோதியது. இதனால் மோட்டார் சைக்கிளில் பயணித்த இருவரும் கீழே விழுந்தனர்.
விபத்தை ஏற்படுத்திய கார் நிற்காமல் அங்கிருந்து சென்றதாகத் தெரிவிக்கப்பட்டுள்ளது. இதைக் கண்ட மற்றொரு மோட்டார் சைக்கிள் ஓட்டுநர், பாதிக்கப்பட்டவர்களுக்கு உதவ முன்வந்தார்.
இந்த விபத்தில் மோட்டார் சைக்கிளை ஓட்டிச் சென்ற 27 வயது ஆடவருக்கும், அவருடன் பின்னால் அமர்ந்து சென்ற 27 வயது பெண்ணுக்கும் லேசான காயங்கள் ஏற்பட்டன. இருவரும் மருத்துவப் பரிசோதனைக்குப் பிறகு மருத்துவமனைக்குச் செல்ல மறுத்துவிட்டதாக சிங்கப்பூர் குடிமைத் தற்காப்புப் படை(SCDF) தெரிவித்தது.
சம்பவம் தொடர்பாகக் காவல்துறையினர் விசாரணை மேற்கொண்டு வருகின்றனர். விபத்தில் தொடர்புடைய BMW காரின் ஓட்டுநரை அடையாளம் கண்டு அவரைக் கண்டறியும் நடவடிக்கைகளும் தொடர்ந்து நடைபெற்று வருகின்றன.
மேலும், விபத்துக்குப் பிறகு நிற்காமல் சென்ற வாகனத்தின் ஓட்டுநர் குறித்த விசாரணையில் புதிய தகவல்கள் வெளியாகுமா என்பதைப் பொறுத்திருந்து பார்க்க வேண்டும்.
Follow us on :
Premium Job Link:https://www.sgtamilan.com/product/premium-member-ship
WHATSAPP CHANNEL LINK