சிங்கப்பூரில் டெங்கு பாதிப்பு 80% அதிகரிப்பு..!! அதிக ஆபத்துள்ள பகுதிகள் எவை?
சிங்கப்பூரில் கடந்த வாரம் டெங்கு காய்ச்சலால் பாதிக்கப்பட்டவர்களின் எண்ணிக்கை குறைந்துள்ள போதிலும், 2026ஆம் ஆண்டின் மூன்றாம் காலாண்டில் டெங்கு பாதிப்பு கணிசமாக அதிகரித்துள்ளது.
அக்டோபர் 17ஆம் தேதியுடன் முடிவடைந்த வாரத்தில் சிங்கப்பூரில் 61 பேர் டெங்கு காய்ச்சலால் பாதிக்கப்பட்டுள்ளனர். இது அதற்கு முந்தைய வாரத்தைவிட 18 குறைவாகும்.
சிங்கப்பூரின் தேசிய சுற்றுப்புற வாரியத்தின் (NEA) தகவலின்படி, அக்டோபர் 19ஆம் தேதி நிலவரப்படி, இந்த ஆண்டில் இதுவரை மொத்தம் 2,710 டெங்கு பாதிப்புகள் பதிவாகியுள்ளன.
2026ஆம் ஆண்டு ஜூலை முதல் செப்டம்பர் வரை, மூன்றாம் காலாண்டில் மொத்தம் 1,384 டெங்கு பாதிப்புகள் பதிவாகியுள்ளன. இது இரண்டாம் காலாண்டுடன் ஒப்பிடுகையில் 79.7% அதிகமாகும்.
இந்தக் காலகட்டத்தில், உள்ளூரில் டெங்கு தொற்றால் பாதிக்கப்பட்ட ஒருவர் உயிரிழந்துள்ளார். மேலும், டெங்கு வைரஸின் நான்கு வகைகளில் மூன்றாம் வகை வைரஸ் அதிகமாகப் பதிவாகியுள்ளது. அதற்கு அடுத்தபடியாக இரண்டாம், முதல் மற்றும் நான்காம் வகை வைரஸ்கள் உள்ளன.
சிங்கப்பூரில் தற்போது எட்டு டெங்கு பரவல் பகுதிகள் செயல்பாட்டில் உள்ளன. அவற்றில் மூன்று பகுதிகளில் தலா 10 அல்லது அதற்கு மேற்பட்ட பாதிப்புகள் பதிவாகியுள்ளன.
👉ஹோ சிங் ரோடு – காங் சிங் ரோடு: 96 பாதிப்புகள்
👉 பீஷான் ஸ்ட்ரீட் 12: 16 பாதிப்புகள்
👉லென்டர் கார்டன்ஸ் – துங் போ அவென்யூ: 13 பாதிப்புகள்
மூன்றாம் காலாண்டில் தேசிய சுற்றுப்புற வாரியம் 94 டெங்கு பரவல் பகுதிகளைக் கண்டறிந்தது. அவற்றில் 80 பகுதிகளில் அதே காலகட்டத்திற்குள் பரவல் முடிவுக்கு வந்தது. முந்தைய காலாண்டுடன் ஒப்பிடுகையில், புதிதாகக் கண்டறியப்பட்ட பரவல் பகுதிகளின் எண்ணிக்கை இருமடங்காக அதிகரித்துள்ளது.
அதே காலகட்டத்தில், 2,600க்கும் மேற்பட்ட ஏடிஸ் கொசுக்கள் இனப்பெருக்கம் செய்யும் இடங்கள் கண்டறியப்பட்டன. இருப்பினும், இது முந்தைய காலாண்டைவிட சுமார் 35% குறைவாகும்.
மே மாதம் முதல் அக்டோபர் வரை சிங்கப்பூரில் டெங்கு பாதிப்பு அதிகரிக்கும் காலமாக இருப்பதால், பொதுமக்கள் விழிப்புடன் இருக்குமாறு தேசிய சுற்றுப்புற வாரியம் அறிவுறுத்தியுள்ளது.
வீடுகள் மற்றும் சுற்றுப்புறங்களில் தேங்கியுள்ள தண்ணீரை அகற்றுதல், பூந்தொட்டிகளின் அடிப்பகுதியில் தண்ணீர் தேங்காமல் பார்த்துக்கொள்ளுதல், தண்ணீர் பாத்திரங்களைத் தொடர்ந்து சுத்தம் செய்தல் போன்ற நடவடிக்கைகள் மூலம் கொசுக்கள் பெருகுவதைத் தடுக்கலாம்.
தற்போது சிங்கப்பூரில் ஸிகா மற்றும் சிக்குன்குனியா வைரஸ் தொற்றுப் பரவல் குழுக்கள் எதுவும் பதிவாகவில்லை.
Follow us on :
Premium Job Link:https://www.sgtamilan.com/product/premium-member-ship
WHATSAPP CHANNEL LINK