சிங்கப்பூரில் சொகுசு வீடுகளில் தொடர் கொள்ளை..!! S$644,700 மதிப்பிலான பொருட்கள் திருட்டு.. 3 பேருக்கு சிறை!
சிங்கப்பூரில் உள்ள தனியார் சொகுசு வீடுகளைக் குறிவைத்து, சுமார் S$645,000 மதிப்பிலான தங்கம், நகைகள், விலையுயர்ந்த கைக்கடிகாரங்கள் மற்றும் பணத்தைத் திருடிய மூன்று வெளிநாட்டு ஆண்களுக்கு ஆறு ஆண்டுகளுக்கும் மேலாகச் சிறைத் தண்டனை விதிக்கப்பட்டுள்ளது.
ஸ்பெயின், கொலம்பியா மற்றும் மெக்சிகோவைச் சேர்ந்த இந்த மூவரும், இணையம் மூலம் வீடுகளைத் தேர்ந்தெடுத்து கொள்ளைச் சம்பவங்களில் ஈடுபட்டுள்ளனர். இவர்களில் ஒருவர் வாகனத்தை ஓட்டியபடி வெளியில் கண்காணிக்க, மற்ற இருவர் வீடுகளுக்குள் புகுந்து பொருட்களைத் திருடியுள்ளனர்.
கடந்த 2025ஆம் ஆண்டு மே 9ஆம் தேதி, டுனியர்ன் சாலை (Dunearn Road) பகுதியில் உள்ள ஒரு சொகுசு வீட்டிற்குள் புகுந்த இருவர், பாதுகாப்புப் பெட்டகத்தைத் திறந்து ஏராளமான பொருட்களைத் திருடியுள்ளனர்.
தங்கக் கட்டிகள், தங்க நகைகள், வைர நகைகள், ரோலக்ஸ், கார்டியர் உள்ளிட்ட விலையுயர்ந்த கைக்கடிகாரங்கள், ஹெர்மீஸ் கைப்பைகள் மற்றும் ரொக்கம் என மொத்தம் S$644,700 மதிப்பிலான பொருட்கள் திருடப்பட்டன.
திருடப்பட்ட பொருட்களில் பெரும்பாலானவற்றை, அவர்கள் தங்கியிருந்த ஹோட்டல் அறையின் மேற்கூரைக்குள் மறைத்து வைத்திருந்தனர்.
மே 10ஆம் தேதி, இங் நியோ அவென்யூ (Eng Neo Avenue) பகுதியில் உள்ள மற்றொரு வீட்டைக் குறிவைத்து அவர்கள் மீண்டும் கொள்ளையடிக்க முயன்றனர். வீட்டின் பாதுகாப்புப் பெட்டகத்தைத் திறக்க முயன்றபோது, அங்கிருந்த வயதான குடியிருப்பாளர் அவர்களைக் கண்டுபிடித்தார்.
கொள்ளையர்கள் தப்பிச் செல்வதைத் தடுக்க, அந்தக் குடியிருப்பாளர் தரையில் தண்ணீரை ஊற்றினார். அப்போது அவர்களில் ஒருவர் வழுக்கி விழுந்தபோதிலும், இறுதியில் தப்பிச் சென்றார். இந்த வீட்டிலிருந்து அவர்கள் எந்தப் பொருளையும் திருடிச் செல்லவில்லை.
மே 11ஆம் தேதி அதிகாலையில், சிங்கப்பூர் காவல்துறையினர் மூவரையும் ஹோட்டல் அருகே கைது செய்தனர். விசாரணையின் அடிப்படையில், ஹோட்டல் அறையின் மேற்கூரைக்குள் மறைத்து வைக்கப்பட்டிருந்த பெரும்பாலான திருட்டுப் பொருட்களையும் காவல்துறையினர் மீட்டனர்.
இந்த வழக்கில், 62 வயதான ஹெர்னாண்டோ கிரால்டோ பிராங்கோவுக்கு (Hernando Giraldo Franco) 6 ஆண்டுகள் 8 மாதங்கள் சிறைத் தண்டனை விதிக்கப்பட்டது. 53 வயதான கார்சியா இக்லேசியாஸ் ஹெக்டர் டேனியல் (Garcia Iglesias Hector Daniel) மற்றும் 49 வயதான கார்செஸ் முரில்லோ மேடியோ ஆண்ட்ரெஸ் (Garces Murillo Mateo Andres) ஆகிய இருவருக்கும் தலா 7 ஆண்டுகள் 4 மாதங்கள் சிறைத் தண்டனை விதிக்கப்பட்டது.
மூவரும் வீடு புகுந்து திருடியது உள்ளிட்ட தலா நான்கு குற்றச்சாட்டுகளை ஒப்புக்கொண்டனர்.
இந்தக் கொள்ளைச் சம்பவங்கள் முன்கூட்டியே திட்டமிடப்பட்டவை என்றும், குடியிருப்பாளர்களின் பாதுகாப்பைப் பாதிக்கும் வகையில் வீடுகளுக்குள் புகுந்து கொள்ளையடித்தது கடுமையான குற்றம் என்றும் நீதிமன்றம் சுட்டிக்காட்டியது.
Follow us on :
Premium Job Link:https://www.sgtamilan.com/product/premium-member-ship
WHATSAPP CHANNEL LINK