சிங்கப்பூரில் பாரம்பரிய சீன மருத்துவத்துக்கு புதிய அங்கீகாரம் ..!! சுகாதார அமைச்சு அறிவிப்பு

சிங்கப்பூரில் பாரம்பரிய சீன மருத்துவத்துக்கு புதிய அங்கீகாரம் ..!! சுகாதார அமைச்சு அறிவிப்பு

சிங்கப்பூரில் பாரம்பரிய சீன மருத்துவச் சேவைகளின் தரத்தை உயர்த்தவும், பொதுமக்களின் நம்பிக்கையை வலுப்படுத்தவும் புதிய அங்கீகாரத் திட்டம் அறிமுகப்படுத்தப்பட்டுள்ளது. இதன் கீழ், ஐந்து பாரம்பரிய சீன மருத்துவச் சேவை வழங்குநர்கள் முதல் முறையாக அங்கீகாரம் பெற்றுள்ளனர்.

சிங்கப்பூர் சுகாதார அமைச்சர் ஓங் யீ காங், அக்டோபர் 17ஆம் தேதி நடைபெற்ற 23ஆவது உலக சீன மருத்துவ மாநாட்டின் தொடக்க நிகழ்ச்சியில் இந்த அங்கீகாரத் திட்டத்தைத் தொடங்கி வைத்தார்.

அங்கீகாரம் பெற்ற முதல் ஐந்து மருத்துவ நிலையங்கள்:
1. செராங்கூனில் அமைந்துள்ள Kwong Wai Shiu TCM Centre
2. NTU Chinese Medicine
3. Singapore Chung Hwa Medical Institution Headquarters
4. Singapore Thong Chai Medical Institution Headquarters
5. நொவீனாவில் அமைந்துள்ள Thomson Chinese Medicine

இந்த அங்கீகாரத் திட்டத்தைச் சிங்கப்பூர் பாரம்பரிய சீன மருத்துவக் கழகமான Academy of Chinese Medicine, Singapore நிர்வகிக்கிறது.

மருத்துவ நிலையங்களின் நிர்வாக நடைமுறைகள், சுகாதாரம், தொற்றுக் கட்டுப்பாடு, மருத்துவ உபகரணங்களின் தரம் மற்றும் சீன மருந்துகளைத் தயாரித்து வழங்கும் முறைகள் உள்ளிட்ட அம்சங்கள் மதிப்பீடு செய்யப்படும். தனிப்பட்ட மருத்துவப் பயிற்சியாளர்களின் கல்வித் தகுதி, மருத்துவ அனுபவம் மற்றும் தொழில்முறைத் தரமும் பரிசீலிக்கப்படும்.

மருத்துவ நிலையங்களுக்கான அங்கீகாரம் மூன்று ஆண்டுகளுக்கும், தனிப்பட்ட மருத்துவப் பயிற்சியாளர்களுக்கான அங்கீகாரம் இரண்டு ஆண்டுகளுக்கும் செல்லுபடியாகும்.

இந்த அங்கீகாரத் திட்டம் தன்னார்வ அடிப்படையிலானது. அதாவது, அங்கீகாரம் பெறுவது கட்டாயமல்ல. ஏற்கெனவே உரிய பதிவுகளையும் செல்லுபடியாகும் பயிற்சி அனுமதிகளையும் கொண்டுள்ள மருத்துவப் பயிற்சியாளர்களும் நிலையங்களும் அங்கீகாரம் பெறாவிட்டாலும் தொடர்ந்து செயல்படலாம்.

அங்கீகாரம் பெற்ற சீன மருத்துவப் பயிற்சியாளர்கள், எதிர்காலத்தில் சிங்கப்பூர் சுகாதார அமைச்சுடன் இணைந்து புதிய மருத்துவச் சேவை முறைகளை உருவாக்குவதற்கான வாய்ப்புகள் ஏற்படலாம்.

மேலும், அங்கீகாரம் பெற்ற சீன மருத்துவப் பயிற்சியாளர்கள் பொது மருத்துவர்களுடன் இணைந்து செயல்படும் முறையில், நோயாளிகளுக்கான எக்ஸ்-ரே பரிசோதனைகளைப் பரிந்துரைக்க முடியுமா என்பது குறித்தும் சிங்கப்பூர் ஆராய்ந்து வருகிறது.

இதற்கிடையில், மருத்துவமனைகளில் குறிப்பிட்ட சீன மருத்துவச் சிகிச்சைகளைப் பரிசோதித்து அவற்றின் பாதுகாப்பு, மருத்துவப் பயன் மற்றும் செலவுத் திறனை மதிப்பிடுவதற்கான திட்டத்தின் இரண்டாம் கட்ட விண்ணப்பங்கள் நவம்பர் 3ஆம் தேதி தொடங்கவுள்ளன. இந்தத் திட்டம் 2029ஆம் ஆண்டு நவம்பர் 2ஆம் தேதி வரை நடைபெறும்.

முன்னதாகத் தேர்ந்தெடுக்கப்பட்ட ஏழு ஆய்வுத் திட்டங்களில் பக்கவாதத்துக்குப் பிந்தைய மறுவாழ்வு, ஒற்றைத் தலைவலி, முழங்கால் மூட்டுவலி, பெண்களின் கருவுறாமை, மருந்துகளுக்குக் கட்டுப்படாத வலிப்பு மற்றும் புற்றுநோயாளிகளுக்கான ஆதரவுச் சிகிச்சை உள்ளிட்டவற்றில் அக்குபஞ்சர் சிகிச்சையின் பயன்பாடு ஆராயப்படுகிறது.

பாரம்பரிய சீன மருத்துவத்தின் தரத்தை மேம்படுத்துவதுடன், அதன் பாதுகாப்பையும் மருத்துவப் பயனையும் அறிவியல் ரீதியாக மதிப்பிட்டு, சிங்கப்பூரின் சுகாதாரப் பராமரிப்பு முறையில் அதன் பங்களிப்பை விரிவுபடுத்துவது இந்த முயற்சிகளின் நோக்கமாகும்.