2 மாதங்களாகச் சம்பளம் கிடைக்கவில்லை..! சிங்கப்பூரில் வெளிநாட்டு ஊழியர்களுக்கு ஏற்பட்ட சிக்கல்!
சிங்கப்பூரில் பணிபுரியும் சுமார் 240 வெளிநாட்டு ஊழியர்களுக்கு இரண்டு மாதங்கள் வரை சம்பளம் வழங்கப்படவில்லை என்ற புகார் எழுந்துள்ளது. இதையடுத்து, பாதிக்கப்பட்ட ஊழியர்களுக்கு உதவுவதற்காக தேசிய தொழிற்சங்கக் காங்கிரஸின் வெளிநாட்டு ஊழியர் மையமும் (MWC), மனிதவள அமைச்சகமும் இணைந்து நடவடிக்கைகளை மேற்கொண்டு வருகின்றன.
செயல்முறைத் தொழில் துறையில் பணிபுரியும் இந்த ஊழியர்கள், Process Maintenance Solutions Pte Ltd மற்றும் Jurong Technical & Construction Pte Ltd ஆகிய நிறுவனங்களில் வேலை செய்து வந்ததாகத் தெரிவிக்கப்பட்டுள்ளது.
பாதிக்கப்பட்ட ஊழியர்களில் பலருக்கு ஒன்று முதல் இரண்டு மாதங்கள் வரை சம்பளம் வழங்கப்படவில்லை எனக் கூறப்படுகிறது. இவர்களில் பெரும்பாலானோர் தங்களது குடும்பத்தின் முக்கிய வருமான ஆதாரமாக இருப்பதால், சம்பளத் தாமதம் அவர்களது குடும்பங்களையும் பாதித்துள்ளது.
இந்தப் பிரச்சினை குறித்து அறிந்த வெளிநாட்டு ஊழியர் மையமும், மனிதவள அமைச்சகத்தின் Assurance, Care and Engagement (ACE) குழுவும் அக்டோபர் 19 மற்றும் 20ஆம் தேதிகளில் பாதிக்கப்பட்ட ஊழியர்களைச் சந்தித்தன. அப்போது, அவர்களின் தேவைகள், சம்பளப் பிரச்சினைகள் மற்றும் உடனடி உதவிகள் குறித்து கேட்டறியப்பட்டது.
சுமார் 230 ஊழியர்களைச் சந்தித்து அவர்களுக்குத் தேவையான உதவிகளை வழங்குவதற்கான நடவடிக்கைகள் மேற்கொள்ளப்பட்டதாகத் தெரிவிக்கப்பட்டுள்ளது.
பாதிக்கப்பட்டவர்களில் சுமார் 90 ஊழியர்களுக்கு அன்றாட உணவு வழங்கப்பட்டு வருகிறது. மேலும், ஊழியர்கள் தங்குவதற்கான மாற்று ஏற்பாடுகளைச் செய்வதற்காக மனிதவள அமைச்சகத்துடன் இணைந்து பணிகள் நடைபெறுகின்றன.
இதனுடன், வேலை இழந்துள்ள ஊழியர்கள் சிங்கப்பூரில் புதிய வேலைவாய்ப்புகளைப் பெறுவதற்கும் உதவி செய்யப்படுகிறது. அவர்களுக்குப் பொருத்தமான வேலைகளை அடையாளம் காண்பதுடன், புதிய வேலைக்கு மாறுவதற்கான நடைமுறைகளிலும் ஆதரவு வழங்கப்படுகிறது.
ஊழியர்களுக்குச் சேர வேண்டிய நிலுவைச் சம்பளம் மற்றும் கூடுதல் நேரப் பணிக்கான தொகையைப் பெற்றுத்தரவும் வெளிநாட்டு ஊழியர் மையம் உதவி செய்து வருகிறது. இதற்காக உரிய அமைப்புகளிடம் சம்பளக் கோரிக்கைகளைச் சமர்ப்பிப்பதற்கான வழிகாட்டுதலும் வழங்கப்படுகிறது.
சில ஊழியர்கள் சிங்கப்பூரில் வேலைக்குச் சேர்வதற்காக 12,000 வெள்ளி வரை செலவிட்டதாகக் கூறியுள்ளனர். இந்நிலையில், சம்பளம் கிடைக்காதது அவர்களுக்குக் கூடுதல் பொருளாதாரச் சுமையை ஏற்படுத்தியுள்ளது.
நிலுவைத் தொகையை நிறுவனங்களால் வழங்க முடியாத சூழல் ஏற்பட்டால், தேவைக்கேற்ப நிதியுதவியும் வழங்கப்படலாம் எனத் தெரிவிக்கப்பட்டுள்ளது.
சம்பளப் பிரச்சினை அல்லது பணியிட நலன் தொடர்பான சிக்கல்களை எதிர்கொள்ளும் வெளிநாட்டு ஊழியர்கள் தாமதிக்காமல் உதவி கோருமாறு வெளிநாட்டு ஊழியர் மையம் அறிவுறுத்தியுள்ளது.
உதவி தேவைப்படுவோர் வெளிநாட்டு ஊழியர் மையத்தின் 24 மணி நேர உதவி எண்ணான 6536 2692 என்ற எண்ணைத் தொடர்புகொள்ளலாம்.
ஊழியர்கள் தங்களது உழைப்புக்குரிய சம்பளத்தை உரிய நேரத்தில் பெறுவதை உறுதிசெய்வது நிறுவனங்களின் பொறுப்பு என்றும், பாதிக்கப்பட்டவர்களுக்கு உரிய ஆதரவை வழங்க நடவடிக்கைகள் தொடர்ந்து மேற்கொள்ளப்படும் என்றும் தெரிவிக்கப்பட்டுள்ளது.
Follow us on :
Premium Job Link:https://www.sgtamilan.com/product/premium-member-ship
WHATSAPP CHANNEL LINK