S$3 பில்லியன் பணமோசடி வழக்கு: குற்றவாளியின் அண்ணனுக்கு 12 மாதங்கள் சிறை..!!
சிங்கப்பூரில் பெரும் பரபரப்பை ஏற்படுத்திய S$3 பில்லியன் பணமோசடி வழக்கில் தண்டனை பெற்ற Zhang Ruijin என்பவரின் அண்ணனான Zhang Ruisheng-க்கு 12 மாதங்கள் சிறைத்தண்டனை விதிக்கப்பட்டுள்ளது. குற்றச் செயல்கள் மூலம் கிடைத்ததாகக் கூறப்படும் S$17.6 மில்லியனுக்கும் அதிகமான தொகையை வைத்திருந்த குற்றத்தை அவர் ஒப்புக்கொண்டதைத் தொடர்ந்து இந்தத் தண்டனை விதிக்கப்பட்டது.
54 வயதான Zhang Ruisheng, கடந்த அக்டோபர் 19ஆம் தேதி நீதிமன்றத்தில் தனது குற்றத்தை ஒப்புக்கொண்டார். சீன நாட்டவரான அவர், சிங்கப்பூரில் வேலை அனுமதிச் சீட்டின் அடிப்படையில் வசித்து வந்தார்.
2020ஆம் ஆண்டு ஆகஸ்ட் மாதம், Zhang Ruisheng சிங்கப்பூரில் உள்ள CIMB வங்கியில் கணக்கொன்றைத் தொடங்கினார். கணக்கைத் தொடங்கியபோது அதில் S$250,000 இருந்தது.
அதே ஆண்டு ஆகஸ்ட் முதல் செப்டம்பர் மாதம் வரை, வெளிநாடுகளில் இருந்து அவரது வங்கிக் கணக்கிற்கு 11 தவணைகளில் சுமார் S$17.6 மில்லியன் பணம் வந்தது. இந்தப் பணம் Beiyin மற்றும் Han Li எனப்படும் இரண்டு நிறுவனங்களிடமிருந்து அனுப்பப்பட்டதாகத் தெரிவிக்கப்பட்டது.
கணக்கில் குறுகிய காலத்திலேயே அதிக அளவிலான பணம் வந்ததால், வங்கியின் கண்காணிப்பு அமைப்பில் எச்சரிக்கை எழுந்தது. இதையடுத்து, பணத்தின் மூலத்தைக் குறித்து வங்கி அவரிடம் விளக்கம் கேட்டது.
அப்போது, மக்காவ்வில் இருந்த சொத்தை விற்றதன் மூலம் இந்தப் பணம் கிடைத்ததாக அவர் கூறியதுடன், அதற்கான ஆதாரங்களாகச் சில ஆவணங்களையும் சமர்ப்பித்தார். ஆனால், பின்னர் அந்த ஆவணங்கள் போலியானவை என்பது விசாரணையில் தெரியவந்தது.
அந்த இரண்டு நிறுவனங்களுடனும் தமக்கு எந்தவிதமான வணிகத் தொடர்பும் இல்லை என்றும், மக்காவ்வில் தமக்குச் சொத்து இருந்ததில்லை என்றும் Zhang Ruisheng பின்னர் ஒப்புக்கொண்டார்.
கணக்கிற்கு வந்த பணத்தில் சுமார் S$10.4 மில்லியனை, 2020ஆம் ஆண்டு செப்டம்பர் முதல் அக்டோபர் மாதம் வரை சென்டோசா கோவ் பகுதியில் உள்ள 69 Cove Drive என்ற முகவரியில் அமைந்துள்ள சொத்தை வாங்குவதற்கும் முத்திரைத் தீர்வை செலுத்துவதற்கும் அவர் பயன்படுத்தினார்.
மேலும், வங்கிக் கணக்கில் எஞ்சியிருந்த சுமார் S$5 மில்லியனை, வங்கிக் கணக்கு மூடப்படுவதற்கு முன்பு காசோலை மூலம் எடுத்துள்ளார். 2021ஆம் ஆண்டு மார்ச் மாதத்தில், மற்றொரு வங்கியிலிருந்து S$2.1 மில்லியன் காசோலையைப் பெற்றதாகவும் நீதிமன்றத் தகவல்கள் தெரிவிக்கின்றன. அந்தத் தொகை சென்டோசா கோவ் பகுதியில் உள்ள மற்றொரு சொத்தின் முன்பணத்திற்குப் பயன்படுத்தப்பட்டது.
சிங்கப்பூர் வணிக விவகாரத் துறை (Commercial Affairs Department) 2023ஆம் ஆண்டு ஆகஸ்ட் மாதம் முதல் Zhang Ruisheng தொடர்பான விசாரணையைத் தொடங்கியது.
விசாரணையின்போது, அவருக்குச் சொந்தமான 69 Cove Drive சொத்தின் மீது சொத்துப் பரிமாற்றத் தடை உத்தரவு பிறப்பிக்கப்பட்டது. மேலும், Toyota Vellfire கார் ஒன்றும் பறிமுதல் செய்யப்பட்டது.
தற்போதைய வழக்கில், அந்தச் சொத்தையும் பறிமுதல் செய்யப்பட்ட காரையும் அரசிடம் ஒப்படைக்க அவர் ஒப்புக்கொண்டார்.
Zhang Ruisheng-ன் தம்பியான Zhang Ruijin, சிங்கப்பூரில் நடந்த S$3 பில்லியன் பணமோசடி வழக்கில் குற்றவாளியாகத் தண்டிக்கப்பட்டவர்களில் ஒருவர். போலி ஆவணங்களைப் பயன்படுத்தியது மற்றும் பணமோசடி தொடர்பான குற்றங்களுக்காக 2024ஆம் ஆண்டு அவருக்கு 15 மாதங்கள் சிறைத்தண்டனை விதிக்கப்பட்டது.
இந்த வழக்கு, சிங்கப்பூரில் வெளிநாடுகளிலிருந்து வந்த பெரும் தொகையிலான சட்டவிரோதப் பணம் தொடர்பாக நடைபெற்ற முக்கிய விசாரணைகளில் ஒன்றாகும்.
Follow us on :
Premium Job Link:https://www.sgtamilan.com/product/premium-member-ship
WHATSAPP CHANNEL LINK