சிங்கப்பூர் விமானத்தில் மயங்கிய ஊழியர்..!! பதற்றத்திலும் துணிச்சலாகச் செயல்பட்ட பெண் பயணி..!!
சிங்கப்பூர் ஏர்லைன்ஸ் விமானத்தில் பயணித்த ஆண் விமானப் பணியாளர் ஒருவர், நடுவானில் திடீரென உடல்நலக்குறைவு ஏற்பட்டு மயக்கமடைந்த சம்பவம் பரபரப்பை ஏற்படுத்தியுள்ளது. அப்போது, விமானத்தில் பயணித்த முன்னாள் மருத்துவ நிபுணரான பெண் ஒருவர் விரைந்து செயல்பட்டு அவருக்கு அவசர சிகிச்சை அளித்துள்ளார். இதனால், அந்த விமானப் பணியாளரின் உடல்நிலை படிப்படியாகச் சீரடைந்துள்ளது.
கடந்த அக்டோபர் 17ஆம் தேதி சனிக்கிழமை மாலை, சீனாவின் செங்டு நகரிலிருந்து சிங்கப்பூருக்குப் புறப்பட்ட சிங்கப்பூர் ஏர்லைன்ஸ் விமானமான SQ843-ல் இந்தச் சம்பவம் நிகழ்ந்துள்ளது. செங்டு தியான்ஃபு சர்வதேச விமான நிலையத்திலிருந்து மாலை 6.32 மணிக்குப் புறப்பட்ட விமானத்தில், புறப்பட்ட சிறிது நேரத்திலேயே மருத்துவ உதவி தேவைப்படுவதாக விமானப் பணிப்பெண் அறிவிப்பு வெளியிட்டுள்ளார்.
முதலில், விமானத்தில் வேறு மருத்துவர்கள் இருப்பார்கள் என நினைத்ததால், நிக்கோல் கே என்ற பெண் பயணி உடனடியாக எழுந்திருக்கவில்லை. ஆனால், இரண்டாவது முறையாக மருத்துவ உதவிக்கான அறிவிப்பு வெளியிடப்பட்டபோது, அவர் எழுந்து சென்று நிலைமையைப் பார்க்க முடிவு செய்தார்.
அப்போது, ஓர் இளம் ஆண் விமானப் பணியாளர் தரையில் பலவீனமான நிலையில் கிடப்பதைக் கண்டார். அவரது நாடித்துடிப்பு சீராக இருந்தபோதிலும் மிகவும் பலவீனமாக இருந்தது. மேலும், அவரது கைகள் மற்றும் கால்கள் குளிர்ச்சியாக இருந்ததுடன், அவர் குழப்பமான நிலையில் காணப்பட்டார். அவரால் சில வார்த்தைகளை மட்டுமே பேச முடிந்ததாகவும், கேள்விகளுக்குச் சரியாகப் பதிலளிக்க முடியாமல் தொடர்ந்து வாந்தி வருவதாகக் கூறியதாகவும் தெரிவிக்கப்பட்டுள்ளது.
இதையடுத்து, நிக்கோல் கே மற்ற விமானப் பணியாளர்களிடம் ஸ்டெதாஸ்கோப் உள்ளிட்ட மருத்துவ உபகரணங்களைக் கேட்டுப் பெற்றார். விமானப் பணியாளரின் இரத்த அழுத்தம், இரத்தத்தில் ஆக்சிஜன் அளவு மற்றும் இரத்தச் சர்க்கரை அளவைப் பரிசோதிக்க ஏற்பாடு செய்தார்.
தொடர்ந்து, அவருக்கு நரம்பு வழியாகத் திரவங்களைச் செலுத்துவதற்கான IV குழாயைப் பொருத்தினார். முதல் முயற்சியிலேயே அது வெற்றிகரமாக அமைந்ததாகக் கூறப்படுகிறது. பின்னர், நரம்பு வழிச் சிகிச்சை தொடங்கப்பட்டதுடன், குமட்டலைக் கட்டுப்படுத்தும் மருந்தும் வழங்கப்பட்டது. அவரது உடல்நிலையை மருத்துவ உதவியாளர் தொடர்ந்து கண்காணித்தார்.
சுமார் அரை மணி நேரத்திற்குப் பிறகு, விமானப் பணியாளரின் உடல்நிலையில் முன்னேற்றம் ஏற்பட்டது. இரவு 8.30 மணியளவில் அவரது நாடித்துடிப்பு வலுப்பெற்றதுடன், அவர் மீண்டும் சுயநினைவு பெற்றார்.
இந்த அனுபவத்தை நிக்கோல் கே, சீனாவின் சியாவோஹாங்ஷு சமூக ஊடகத் தளத்தில், “விமானத்தில் ஒருவரைக் காப்பாற்றுவது எப்படி இருக்கும்?” என்ற தலைப்பில் பகிர்ந்துள்ளார். அவசர சிகிச்சைப் பிரிவிலிருந்து நீண்டகாலம் விலகியிருந்ததால், இந்தச் சூழலை எதிர்கொள்ளத் தனக்குப் பயமாக இருந்ததாகவும் அவர் குறிப்பிட்டுள்ளார். இருப்பினும், இரண்டாவது அறிவிப்பைக் கேட்டதும் எழுந்து சென்று உதவியதற்காகத் தன்னைப் பாராட்டிக்கொண்டதாகவும் தெரிவித்துள்ளார்.
அவரது பதிவுக்குக் கிடைத்த 400-க்கும் மேற்பட்ட கருத்துகளில், பலரும் அவரது துணிச்சலையும் மனிதநேயத்தையும் பாராட்டினர். அதே விமானத்தில் பயணித்த ஒருவர், “நீங்கள் உதவ முன்வந்ததைப் பார்த்தபோது எனக்குப் பாதுகாப்பாக உணர்ந்தது. உங்கள் தைரியத்திற்கும் கருணைக்கும் மிகவும் நன்றி” என நெகிழ்ச்சியுடன் கருத்துத் தெரிவித்துள்ளார்.
அவசர நேரத்தில் தயங்காமல் முன்வந்து உதவிய ஒரு பெண்ணின் செயல், சக மனிதர்களின் உயிரைக் காப்பாற்றுவதில் மருத்துவ அறிவும் துணிச்சலும் எவ்வளவு முக்கியமானவை என்பதை மீண்டும் உணர்த்தியுள்ளது.
Follow us on :
Premium Job Link:https://www.sgtamilan.com/product/premium-member-ship
WHATSAPP CHANNEL LINK