சிங்கப்பூர் குடியிருப்பில் திடீர் தீ விபத்து..! புகையைச் சுவாசித்த 2 பேர் மருத்துவமனையில் அனுமதி!
சிங்கப்பூரின் குவீன்ஸ்டவுன் பகுதியில் உள்ள மேய் லிங் ஸ்ட்ரீட் (Mei Ling Street) புளோக் 158 குடியிருப்பில் ஏற்பட்ட தீ விபத்தால் இருவர் மருத்துவமனையில் அனுமதிக்கப்பட்டனர். முன்னெச்சரிக்கை நடவடிக்கையாக சுமார் 25 பேர் அங்கிருந்து வெளியேற்றப்பட்டனர்.
அக்டோபர் 19ஆம் தேதி நண்பகல் சுமார் 12:30 மணியளவில், புளோக் 158 மேய் லிங் ஸ்ட்ரீட்டில் தீ விபத்து ஏற்பட்டதாக சிங்கப்பூர் குடிமைத் தற்காப்புப் படைக்கு (SCDF) தகவல் கிடைத்தது.
கட்டடத்தின் 10-வது மாடியில் உள்ள ஒரு வீட்டின் வெளியே வைக்கப்பட்டிருந்த பொருட்களில் தீப்பற்றியது. சம்பவ இடத்திற்கு விரைந்த தீயணைப்புப் படையினர், தண்ணீரைப் பீய்ச்சியடித்து தீயைக் கட்டுப்படுத்தினர்.
தீ ஏற்பட்ட வீட்டிலிருந்து இருவர் மீட்கப்பட்டனர். அவர்களில் ஒருவர் புகையைச் சுவாசித்ததால் சிங்கப்பூர் பொது மருத்துவமனைக்கு (SGH) சிகிச்சைக்காகக் கொண்டு செல்லப்பட்டார். அருகிலுள்ள மற்றொரு வீட்டைச் சேர்ந்த ஒருவரும் புகையைச் சுவாசித்ததால் அதே மருத்துவமனையில் அனுமதிக்கப்பட்டார்.
மேலும், பாதுகாப்பு முன்னெச்சரிக்கை நடவடிக்கையாகக் காவல்துறையினரும் குடிமைத் தற்காப்புப் படையினரும் இணைந்து சுமார் 25 பேரைக் குடியிருப்புப் பகுதியிலிருந்து வெளியேற்றினர்.
சம்பவம் குறித்து தகவல் அறிந்த குவீன்ஸ்டவுன் தொகுதி நாடாளுமன்ற உறுப்பினர் எரிக் சூவா, சம்பவ இடத்திற்குச் சென்று குடியிருப்பாளர்களின் கவலைகளைக் கேட்டறிந்தார். மீட்புப் பணியில் ஈடுபட்ட அதிகாரிகளுக்கும் அவர் நன்றி தெரிவித்தார்.
இந்தத் தீ விபத்துக்கான காரணம் குறித்து அதிகாரிகள் தொடர்ந்து விசாரணை நடத்தி வருகின்றனர்.
குடியிருப்புப் பகுதிகளில் தீ விபத்துகள் ஏற்படாமல் தடுக்க, வீட்டின் வெளியே பொருட்களை வைக்கும்போது பாதுகாப்பு நடவடிக்கைகளைக் கடைப்பிடிப்பது அவசியம்.
Follow us on :
Premium Job Link:https://www.sgtamilan.com/product/premium-member-ship
WHATSAPP CHANNEL LINK