சிங்கப்பூரில் டெங்கு பாதிப்பு மீண்டும் அதிகரிப்பு! 11 இடங்களில் எச்சரிக்கை..உங்கள் பகுதியும் இதில் உள்ளதா?
சிங்கப்பூரில் டெங்கு காய்ச்சல் பாதிப்பு தொடர்ந்து அதிகரித்து வருவது பொதுமக்களிடையே கவலையை ஏற்படுத்தியுள்ளது. கடந்த இரண்டு வாரங்களாக டெங்கு பாதிப்பு அதிகரித்து வரும் நிலையில், அக்டோபர் 25 முதல் 31ஆம் தேதி வரையிலான ஒரே வாரத்தில் புதிதாக 68 பேருக்கு டெங்கு தொற்று பதிவாகியுள்ளது. இது அதற்கு முந்தைய வாரத்துடன் ஒப்பிடுகையில் 7 பேர் அதிகமாகும்.
தேசிய சுற்றுப்புற வாரியத்தின் (NEA) சமீபத்திய தகவலின்படி, நவம்பர் 2ஆம் தேதி நிலவரப்படி, இந்த ஆண்டில் சிங்கப்பூரில் இதுவரை மொத்தம் 2,836 டெங்கு பாதிப்புகள் பதிவாகியுள்ளன.
சிங்கப்பூர் முழுவதும் தற்போது 11 இடங்களில் டெங்கு பாதிப்புக் குழுமங்கள் (Dengue Clusters) செயல்பாட்டில் உள்ளன. இதில் 10 அல்லது அதற்கு மேற்பட்ட தொற்றுகள் பதிவாகியுள்ள மூன்று பகுதிகள் சிவப்பு எச்சரிக்கைப் பகுதிகளாக வகைப்படுத்தப்பட்டுள்ளன.
அவற்றில் அதிக பாதிப்புகள் பதிவாகியுள்ள பகுதியாக River Valley Road, Orchard Boulevard மற்றும் St Thomas Walk ஆகியவற்றைச் சுற்றியுள்ள இடங்கள் உள்ளன. இப்பகுதியில் டெங்கு பாதிப்பு எண்ணிக்கை 100 ஆக அதிகரித்துள்ளது.
மேலும், Bishan Street 12 பகுதியில் உள்ள குடியிருப்புப் பகுதிகளிலும், Lentor Gardens, Tung Po Avenue மற்றும் Munshi Abdullah Avenue ஆகியவற்றைச் சுற்றியுள்ள பகுதிகளிலும் தலா 20 டெங்கு பாதிப்புகள் பதிவாகியுள்ளன.
இதற்கிடையே, சிங்கப்பூரில் தற்போது ஸிகா (Zika) மற்றும் சிக்குன்குனியா (Chikungunya) நோய்களுக்கான பாதிப்புக் குழுமங்கள் எதுவும் பதிவாகவில்லை எனத் தெரிவிக்கப்பட்டுள்ளது.
இருப்பினும், டெங்கு பரவலை ஏற்படுத்தும் ஏடிஸ் (Aedes) கொசுக்களின் இனப்பெருக்கத்தைக் கட்டுப்படுத்த பொதுமக்கள் தொடர்ந்து விழிப்புடன் இருக்க வேண்டும் என்று அதிகாரிகள் அறிவுறுத்தியுள்ளனர்.
வீடுகள் மற்றும் சுற்றுப்புறங்களில் தண்ணீர் தேங்குவதைத் தவிர்க்க வேண்டும். பூந்தொட்டிகளின் அடிப்பகுதியில் தேங்கும் நீரை அகற்றுதல், தண்ணீர் வாளிகளைத் தலைகீழாக வைத்தல், பூச்சாடிகளில் உள்ள தண்ணீரைத் தவறாமல் மாற்றுதல் உள்ளிட்ட தடுப்பு நடவடிக்கைகளை மேற்கொள்ள வேண்டும்.
கொசுக்கள் இனப்பெருக்கம் செய்யக்கூடிய இடங்களை முறையாகச் சுத்தம் செய்வதன் மூலம் டெங்கு பரவலைக் குறைக்க முடியும். எனவே, பொதுமக்கள் தங்கள் வீடுகள் மட்டுமின்றி சுற்றுப்புறங்களையும் தூய்மையாக வைத்துக்கொண்டு முன்னெச்சரிக்கை நடவடிக்கைகளைத் தொடர்ந்து கடைப்பிடிக்க வேண்டும் என அதிகாரிகள் வலியுறுத்தியுள்ளனர்.
Follow us on :
Premium Job Link:https://www.sgtamilan.com/product/premium-member-ship
WHATSAPP CHANNEL LINK