சிங்கப்பூரில் திடீரென தீப்பிடித்த மறுசுழற்சி தொட்டி..துணிச்சலாக களமிறங்கிய 2 இளைஞர்கள்!
சிங்கப்பூரின் Admiralty Drive பகுதியில் உள்ள HDB குடியிருப்புத் தொகுதியின் கீழ்தளத்தில் மறுசுழற்சி தொட்டி திடீரென தீப்பிடித்த நிலையில், இரண்டு இளைஞர்கள் உடனடியாக செயல்பட்டு தீயை அணைத்த சம்பவம் பலரது பாராட்டையும் பெற்றுள்ளது.
இந்தச் சம்பவம் அக்டோபர் 4ஆம் தேதி இரவு சுமார் 8:20 மணியளவில், Admiralty Drive-இல் உள்ள பிளாக் 354B HDB குடியிருப்பின் கீழ்தளத்தில் நடந்தது.
அங்கிருந்த நீல நிற மறுசுழற்சி தொட்டியில் இருந்த பொருட்கள் திடீரென தீப்பிடித்தன. தீயின் தாக்கம் அதிகமாக இருந்ததாக சம்பவத்தை நேரில் பார்த்த ஒருவர் தெரிவித்துள்ளார்.
தீப்பிடித்ததைப் பார்த்த 2 இளைஞர்கள் தயங்காமல் அருகில் இருந்த தீயணைப்பான்களை எடுத்துக்கொண்டு சம்பவ இடத்துக்கு விரைந்தனர்.
இருவரும் தலா ஒரு தீயணைப்பானை பயன்படுத்தி, சில நொடிகளிலேயே தீயை கட்டுப்படுத்தினர். பின்னர் அருகிலிருந்த குப்பைக் குழாயில் இருந்து தண்ணீர் குழாயையும் பயன்படுத்தி தீ முழுமையாக அணைக்கப்பட்டதாக தெரிவிக்கப்பட்டுள்ளது.
சம்பவத்தை ஒருவர் காணொளியாக பதிவு செய்து சமூக வலைத்தளத்தில் வெளியிட்டார். அதில், தீயை அணைக்க இளைஞர்கள் துணிச்சலுடன் செயல்பட்ட காட்சி இடம்பெற்றிருந்தது.
இந்தக் காணொளி சமூக வலைத்தளங்களில் கவனம் பெற்றதுடன், பலரும் இளைஞர்களின் துணிச்சலையும் துரிதமான செயல்பாட்டையும் பாராட்டினர்.
தீப்பிடித்தபோது புகை அதிகமாக இருந்ததாகவும், எதிரே உள்ள HDB கட்டிடத்தின் ஐந்தாவது மாடியிலிருந்தே புகை வாசனையை உணர முடிந்ததாகவும் சம்பவத்தை பதிவு செய்த நபர் தெரிவித்தார்.
சிங்கப்பூர் குடிமைத் தற்காப்புப் படை (SCDF) சம்பவம் தொடர்பாக தெரிவிக்கையில், தீயணைப்பு வீரர்கள் சம்பவ இடத்துக்கு வருவதற்கு முன்பே பொதுமக்கள் தீயணைப்பான்களைப் பயன்படுத்தி தீயை அணைத்துவிட்டதாக கூறியது.
மறுசுழற்சி தொட்டிக்குள் இருந்த பொருட்களே தீப்பிடித்ததாகவும், இந்தச் சம்பவத்தில் யாருக்கும் காயம் ஏற்படவில்லை என்றும் SCDF தெரிவித்துள்ளது.
தீ விபத்துக்கான காரணம் குறித்து தற்போது விசாரணை நடைபெற்று வருகிறது.
ஆபத்தான சூழ்நிலையில் தாமதிக்காமல் செயல்பட்டு தீயை கட்டுப்படுத்திய அந்த இரண்டு இளைஞர்களின் செயல், அப்பகுதி மக்களிடையேயும் இணையவாசிகளிடையேயும் பாராட்டைப் பெற்றுள்ளது. அவர்களின் துரிதமான நடவடிக்கை, தீ மேலும் பரவாமல் தடுக்க உதவியதாக தெரிவிக்கப்பட்டுள்ளது.
Follow us on :
Premium Job Link:https://www.sgtamilan.com/product/premium-member-ship
WHATSAPP CHANNEL LINK