முஸ்லிம் குடும்பத்தின் வீட்டை குறிவைத்த நபர்..! நீதிமன்றம் அதிரடி தீர்ப்பு!
சிங்கப்பூரில் முஸ்லிம் பெண்ணின் வீட்டிற்கு வெளியே பன்றி இறைச்சியை வைத்து, இஸ்லாம் குறித்து அவமதிக்கும் வகையிலான குறிப்பையும் விட்டுச் சென்ற 37 வயது நபருக்கு 4 மாதங்கள் சிறைத்தண்டனை விதிக்கப்பட்டுள்ளது.
Daniel Goh என்ற அந்த நபர், மற்றொருவரின் மத நம்பிக்கையை வேண்டுமென்றே அவமதித்ததாகக் கூறப்படும் குற்றச்சாட்டை சிங்கப்பூரின் Maintenance of Religious Harmony Act சட்டத்தின் கீழ் ஒப்புக்கொண்டார். இந்த வழக்கில் அவரது மனநலப் பிரச்சினையும் நீதிமன்றத்தின் கவனத்திற்கு கொண்டு வரப்பட்டது.
நீதிமன்றத்தில் தெரிவிக்கப்பட்ட தகவல்களின்படி, Goh கடந்த மார்ச் மாதத்திற்கு முன்பு முஸ்லிம் ஒருவரின் வீட்டிற்கு வெளியே இஸ்லாத்தை அவமதிக்கும் வகையிலான குறிப்பையும் பன்றி இறைச்சியையும் வைக்க வேண்டும் என்ற எண்ணத்தை கொண்டிருந்தார்.
இதற்காக அவர் Tampines பகுதியில் உள்ள HDB குடியிருப்புப் பகுதியில் முஸ்லிம் குடும்பங்கள் வசிக்கும் வீடுகளைத் தேடியுள்ளார். வீடுகளின் வெளியே காணப்பட்ட இஸ்லாமிய எழுத்துகளை அடையாளமாகக் கொண்டு இரண்டு வீடுகளைத் தேர்வு செய்த அவர், அவற்றின் புகைப்படங்களையும் எடுத்துள்ளார்.
பின்னர் அவர் பன்றி இறைச்சியை வாங்கி, அவமதிக்கும் வகையிலான வார்த்தைகள் அடங்கிய குறிப்பைத் தயாரித்ததாக நீதிமன்றத்தில் தெரிவிக்கப்பட்டது.
கடந்த மார்ச் 15ஆம் தேதி அதிகாலை சுமார் 5:35 மணியளவில், Goh முன்பு அடையாளம் கண்டிருந்த ஒரு வீட்டிற்குச் சென்று அதன் வாசலுக்கு வெளியே பன்றி இறைச்சியை வைத்துள்ளார். அதனுடன் அவமதிக்கும் வகையிலான குறிப்பையும் விட்டுச் சென்றுள்ளார்.
அன்று பிற்பகல் சுமார் 3 மணியளவில், 37 வயதான வீட்டின் உரிமையாளர் கதவைத் திறந்தபோது பன்றி இறைச்சியைக் கண்டுள்ளார். பின்னர் அவர் தனது கணவர் மற்றும் மகனுடன் சேர்ந்து அந்தக் குறிப்பையும் பார்த்துள்ளார்.
இதையடுத்து சம்பவம் குறித்து காவல்துறைக்கு தகவல் தெரிவிக்கப்பட்டது.
Goh கைது செய்யப்பட்ட பின்னர் Institute of Mental Health (IMH) மருத்துவ மதிப்பீட்டிற்கு உட்படுத்தப்பட்டார். அவருக்கு treatment-resistant schizophrenia எனப்படும் கடுமையான மனநலப் பிரச்சினை இருப்பது கண்டறியப்பட்டது.
தனது குடும்பத்திற்கு ஏதேனும் ஆபத்து ஏற்படாமல் இருக்க, தன்னை கைது செய்யும்படி ஒரு குரல் தன்னைத் தூண்டியதாக அவர் கூறியிருந்தார்.
எனினும், அவரது மனநிலை குற்றச்செயலுக்கு பங்களித்திருந்தாலும், சம்பவத்திற்கு முன்பாக அவர் இலக்கைத் தேர்வு செய்தது, வீட்டின் புகைப்படங்களை எடுத்தது, பன்றி இறைச்சியை வாங்கியது மற்றும் குறிப்பைத் தயாரித்தது போன்ற நடவடிக்கைகள் திட்டமிடப்பட்ட செயலாக இருந்ததாக நீதிமன்றத்தில் தெரிவிக்கப்பட்டது.
மேலும், அவர் செய்தது தவறு என்பதை அவர் தெளிவாக அறிந்திருந்ததாகவும் மருத்துவ மதிப்பீட்டில் குறிப்பிடப்பட்டது. அவர் மனநிலை தெளிவாக இருந்ததாகவும், தனது வழக்கில் தன்னைத் தற்காத்துக் கொள்ளும் திறன் கொண்டிருந்ததாகவும் மருத்துவர்கள் தெரிவித்தனர்.
வழக்கில் அரசுத் தரப்பு, வெவ்வேறு மதங்களைச் சேர்ந்த சமூகங்களுக்கு இடையிலான நம்பிக்கையும் பரஸ்பர மரியாதையும் சிங்கப்பூர் சமூகத்தின் முக்கிய அடித்தளமாக இருப்பதாக வலியுறுத்தியது.
Goh-ன் நடவடிக்கை மத விரோதத்தையும் வெறுப்பையும் ஏற்படுத்தக்கூடியதாக இருந்ததாக நீதிபதி Kamala Ponnampalam குறிப்பிட்டார். சம்பவத்தில் பாதிக்கப்பட்ட குடும்பத்தினர் மட்டுமின்றி, அண்டை வீட்டாரும் சம்பந்தப்பட்ட பொருட்களைப் பார்த்ததாக நீதிமன்றம் சுட்டிக்காட்டியது.
அதேவேளை, குற்றச்செயலில் அவரது மனநலப் பிரச்சினை பங்களித்திருந்ததை நீதிமன்றம் கருத்தில் கொண்டு, தண்டனை வழங்கும்போது அதற்கு உரிய தணிப்பு காரணியாகக் கருதியது.
இதன் அடிப்படையில் Daniel Goh-க்கு நான்கு மாதங்கள் சிறைத்தண்டனை விதிக்கப்பட்டது.
சிங்கப்பூர் சட்டத்தின் கீழ், மற்றொருவரின் மத நம்பிக்கையை வேண்டுமென்றே அவமதித்த குற்றம் நிரூபிக்கப்பட்டால் அதிகபட்சமாக ஐந்து ஆண்டுகள் வரை சிறைத்தண்டனை, அபராதம் அல்லது இரண்டும் விதிக்கப்படலாம்.
சிங்கப்பூரில் பல்வேறு இன மற்றும் மத சமூகங்கள் இணைந்து வாழும் நிலையில், மத நல்லிணக்கத்தை பாதிக்கும் நடவடிக்கைகள் மீது சட்டம் கடுமையான அணுகுமுறையைப் பின்பற்றுகிறது.
Follow us on :
Premium Job Link:https://www.sgtamilan.com/product/premium-member-ship
WHATSAPP CHANNEL LINK