சிங்கப்பூரில் 2027 முதல் புதிய திட்டம்..!! காலை 7 மணி முதல் இரவு 7 மணி வரை குழந்தைகளுக்குச் சேவை!
சிங்கப்பூரில் கல்வி அமைச்சகத்தின் (MOE) கீழ் இயங்கும் மழலையர் பள்ளிகளில் 2027ஆம் ஆண்டு முதல் முழுநாள் கல்வி மற்றும் பராமரிப்புத் திட்டம் அறிமுகப்படுத்தப்படவுள்ளது. முதற்கட்டமாக இரண்டு மழலையர் பள்ளிகளில் சோதனை முறையில் செயல்படுத்தப்படும் இத்திட்டம், 2028 முதல் 2030ஆம் ஆண்டுக்குள் அனைத்து MOE மழலையர் பள்ளிகளுக்கும் படிப்படியாக விரிவுபடுத்தப்படவுள்ளது.
சிங்கப்பூரில் தற்போது 56 MOE மழலையர் பள்ளிகள் செயல்பட்டு வருகின்றன. இங்கு 5 மற்றும் 6 வயதுடைய குழந்தைகளுக்கு தினமும் நான்கு மணி நேர மழலையர் கல்வி வழங்கப்படுகிறது. பள்ளி நேரத்துக்குப் பிறகும் குழந்தைகளைப் பராமரிக்க வேண்டிய பெற்றோர்கள், தனியாக மழலையர் பள்ளிப் பராமரிப்புச் சேவையான KCare-ஐப் பயன்படுத்தி வருகின்றனர்.
புதிய திட்டத்தின் முதற்கட்டச் சோதனை 2027ஆம் ஆண்டு MK@Rivervale மற்றும் MK@West View ஆகிய இரண்டு மழலையர் பள்ளிகளில் நடைபெறும். இந்தச் சோதனையின் அனுபவங்களின் அடிப்படையில் திட்டம் மேம்படுத்தப்பட்டு, மற்ற பள்ளிகளுக்கும் விரிவுபடுத்தப்படும்.
புதிய முழுநாள் திட்டத்தின்கீழ், பள்ளி நாட்களிலும் பள்ளி விடுமுறைக் காலங்களிலும் வார நாட்களில் காலை 7 மணி முதல் இரவு 7 மணி வரை குழந்தைகளுக்குக் கல்வி, விளையாட்டு மற்றும் பராமரிப்புச் சேவைகள் வழங்கப்படும்.
முழுநாள் சேவை தேவையில்லாத பெற்றோர்கள், காலை 7 மணி முதல் மதியம் 12:30 மணி வரையிலான அரைநாள் திட்டத்தையும் தொடர்ந்து தேர்வு செய்யலாம்.
பொது விடுமுறை நாட்கள், கல்வி அமைச்சகம் குறிப்பிட்ட விடுமுறை நாட்கள் மற்றும் பள்ளி மையம் மூடப்படும் நாட்களில் இந்தச் சேவைகள் இயங்காது.
புதிய திட்டத்தில் குழந்தைகளின் கற்றல் அனுபவத்தை மேம்படுத்தும் வகையில் பல்வேறு செயல்பாடுகள் இடம்பெறும். தாய்மொழி வழியாக விளையாடிக் கற்றல், வெளிப்புற விளையாட்டுகள் மற்றும் குழந்தைகளின் ஆர்வத்தை அடிப்படையாகக் கொண்ட செயல்பாடுகளுக்கு முக்கியத்துவம் அளிக்கப்படும்.
பள்ளி விடுமுறைகளின்போது அறிவியல், தொழில்நுட்பம், பொறியியல், கணிதம், நாடகம் மற்றும் காட்சிக் கலை தொடர்பான நேரடிச் செயல்பாடுகளிலும் குழந்தைகள் பங்கேற்கலாம்.
இதன் மூலம் குழந்தைகள் நாள் முழுவதும் ஒருங்கிணைந்த கற்றல் அனுபவத்தைப் பெறுவதுடன், ஆசிரியர்களுடன் அதிக நேரம் தொடர்புகொண்டு நல்ல உறவை வளர்த்துக்கொள்ளவும் வாய்ப்புக் கிடைக்கும் எனக் கல்வி அமைச்சகம் தெரிவித்துள்ளது.
முழுநாள் சேவையைச் செயல்படுத்துவதற்காக, மழலையர் பள்ளி ஆசிரியர்களுக்கு உதவியாகக் கல்வி அமைச்சகம் புதிய திட்ட அலுவலர்களை நியமிக்கவுள்ளது. குழந்தைகளின் பராமரிப்பு, மேற்பார்வை மற்றும் உணவு நேரம் போன்ற அன்றாடச் செயல்பாடுகளில் இவர்கள் உதவுவார்கள்.
ஆசிரியர்களின் வழக்கமான வேலை நேரம் மாறாது என்றும், பள்ளிகளின் தேவைக்கேற்ப அவர்களின் பணிப்பணி தொடங்கும் நேரத்தில் மாற்றங்கள் இருக்கலாம் என்றும் தெரிவிக்கப்பட்டுள்ளது.
2027ஆம் ஆண்டு முதற்கட்டத் திட்டத்தில் பங்கேற்கும் இரண்டு மழலையர் பள்ளிகளுக்கான மாதாந்திரக் கட்டண விவரங்கள் அறிவிக்கப்பட்டுள்ளன.
சிங்கப்பூர் குடியுரிமை கொண்ட குழந்தைகளுக்கு:
– முழுநாள் திட்டம்: மானியங்களுக்கு முன்பு S$665; மானியங்களுக்குப் பிறகு மாதம் S$3 முதல் S$425 வரை.
– அரைநாள் திட்டம்: மானியங்களுக்கு முன்பு S$310; மானியங்களுக்குப் பிறகு மாதம் S$1 முதல் S$160 வரை.
நிரந்தரவாசிகளுக்கு:
-முழுநாள் திட்டம்: மாதம் S$735.
-அரைநாள் திட்டம்: மாதம் S$320.
குடும்பத்தின் தகுதியைப் பொறுத்து மானியத் தொகை மாறுபடும். புதிய திட்டத்தில் மழலையர் கல்விக்கும் KCare பராமரிப்புக்கும் தனித்தனியாகக் கட்டணம் செலுத்துவதற்குப் பதிலாக ஒரே கட்டணத்தைச் செலுத்தலாம்.
இரண்டு பள்ளிகளில் நடைபெறும் சோதனைத் திட்டத்தின் முடிவுகளை மதிப்பீடு செய்த பிறகு, 2028 முதல் 2030ஆம் ஆண்டுக்குள் அனைத்து MOE மழலையர் பள்ளிகளுக்கும் முழுநாள் திட்டம் படிப்படியாக விரிவுபடுத்தப்படும்.
ஒவ்வோர் ஆண்டும் மார்ச் மாதத்தில் நடைபெறும் மழலையர் பள்ளி மாணவர் சேர்க்கையின்போது, அடுத்த ஆண்டில் முழுநாள் திட்டத்தைச் செயல்படுத்தவுள்ள பள்ளிகளின் பட்டியலைக் கல்வி அமைச்சகம் அறிவிக்கும்.
குழந்தைகளின் கல்வி, விளையாட்டு மற்றும் பராமரிப்பை ஒரே திட்டத்தின்கீழ் கொண்டுவரும் இந்த மாற்றம், பெற்றோருக்குக் கூடுதல் வசதியை ஏற்படுத்துவதுடன், குழந்தைகளின் கற்றல் அனுபவத்தையும் மேம்படுத்தும் என எதிர்பார்க்கப்படுகிறது.
Follow us on :
Premium Job Link:https://www.sgtamilan.com/product/premium-member-ship
WHATSAPP CHANNEL LINK