சிங்கப்பூரில் புதிய மோசடி! பொட்டலம் விநியோகச் செய்தி மூலம் வங்கிப் பணத்தைக் குறிவைக்கும் கும்பல்... எச்சரிக்கை!
சிங்கப்பூரில் ஆப்பிள் ஐமெசேஜ் (iMessage) செயலி மூலம் விரைவு அஞ்சல் சேவை நிறுவனங்களின் பெயர்களைப் பயன்படுத்தி மோசடிகள் நடைபெற்று வருவது குறித்து காவல்துறை எச்சரிக்கை விடுத்துள்ளது. பொட்டலம் விநியோகத்தில் முகவரிப் பிழை ஏற்பட்டுள்ளதாகக் கூறி, பொதுமக்களின் தனிப்பட்ட தகவல்கள் மற்றும் வங்கி விவரங்களைத் திருடும் முயற்சிகள் மேற்கொள்ளப்படுகின்றன.
சிங்கப்பூரில் TracX Logis, uParcel, Park N Parcel உள்ளிட்ட விரைவு அஞ்சல் சேவை நிறுவனங்களின் பெயர்களைப் போலியாகப் பயன்படுத்தி மோசடிக்காரர்கள் பொதுமக்களுக்குக் குறுஞ்செய்திகளை அனுப்பி வருகின்றனர்.
குறிப்பாக, ஆப்பிள் ஐமெசேஜ் செயலி வழியாக அனுப்பப்படும் இச்செய்திகள் கம்போடியா (+855), வியட்னாம் (+84), வட அமெரிக்கா (+1), பிலிப்பீன்ஸ் (+63) உள்ளிட்ட வெளிநாட்டு அழைப்புக் குறியீடுகளைக் கொண்ட எண்களிலிருந்து வருகின்றன.
பெறுநர் வழங்கிய முகவரி தவறாக இருப்பதால் பொட்டலத்தை விநியோகிக்க முடியவில்லை என்று மோசடிச் செய்தியில் குறிப்பிடப்படுகிறது. தொடர்ந்து, பொட்டலத்தை மீண்டும் விநியோகிக்க முகவரியைப் புதுப்பிக்க வேண்டும் எனக் கூறி ஓர் இணைய இணைப்பும் அனுப்பப்படுகிறது.
குறிப்பிட்ட நேரத்திற்குள் முகவரியைப் புதுப்பிக்காவிட்டால் பொட்டலம் விநியோகிக்கப்படாது என்று கூறி பொதுமக்கள் அவசரப்படுத்தப்படுகின்றனர். இதனை நம்பி பலர் அந்த இணைப்பைத் திறக்கும் அபாயம் உள்ளது.
மோசடிக்காரர்கள் அனுப்பும் இணைப்பைத் திறந்தவுடன், உண்மையான அஞ்சல் சேவை நிறுவனத்தின் இணையத்தளத்தைப் போன்றே வடிவமைக்கப்பட்ட போலிப் பக்கத்துக்கு பயனாளர்கள் அழைத்துச் செல்லப்படுகின்றனர்.
அங்கு, பொட்டலத்தை மீண்டும் விநியோகிப்பதற்கான சேவைக் கட்டணம் என்ற பெயரில் சிறிய தொகையைச் செலுத்துமாறு கேட்கப்படுகிறது. பணம் செலுத்தும் நடவடிக்கையின்போது வங்கி அட்டை விவரங்கள் மற்றும் ஒருமுறை பயன்படுத்தப்படும் மறைச்சொல் (OTP) ஆகியவை பெறப்படுகின்றன.
இந்தத் தகவல்களைப் பயன்படுத்தி மோசடிக்காரர்கள் பாதிக்கப்பட்டவர்களின் வங்கிக் கணக்குகளிலிருந்து பணத்தைத் திருடுவதுடன், அனுமதியற்ற பணப் பரிவர்த்தனைகளையும் மேற்கொள்ளக்கூடும்.
சில மோசடிச் செய்திகளில் இணைய இணைப்பை நேரடியாக அனுப்பாமல், அந்த இணைப்பைப் பெறுவதற்காக ‘Y’ என்ற எழுத்தை மட்டும் குறுஞ்செய்தியாக அனுப்புமாறு கேட்கப்படுகிறது.
மேலும், சில செய்திகளில் சம்பந்தப்பட்ட நிறுவனங்களின் உண்மையான வாடிக்கையாளர் சேவை எண்களும் இடம்பெற்றிருப்பதாகக் காவல்துறை தெரிவித்துள்ளது. இதனால், அந்தச் செய்திகள் உண்மையானவை என்று பொதுமக்கள் தவறாக நம்பிவிடக்கூடும்.
இத்தகைய மோசடிகளிலிருந்து தங்களைப் பாதுகாத்துக்கொள்ள, சந்தேகத்திற்குரிய குறுஞ்செய்திகளுக்குப் பதிலளிக்க வேண்டாம் என்று காவல்துறை அறிவுறுத்தியுள்ளது.
தெரியாத எண்களிலிருந்து வரும் இணைய இணைப்புகளைத் திறக்க வேண்டாம். வங்கி விவரங்கள், கடவுச்சொற்கள் மற்றும் ஒருமுறை பயன்படுத்தப்படும் மறைச்சொற்களைப் பகிர வேண்டாம்.
பொட்டலம் விநியோகம் தொடர்பாக ஏதேனும் சந்தேகம் ஏற்பட்டால், சம்பந்தப்பட்ட நிறுவனத்தின் அதிகாரத்துவ இணையத்தளம் அல்லது உறுதிப்படுத்தப்பட்ட வாடிக்கையாளர் சேவை வழியாக மட்டுமே தகவல்களைச் சரிபார்க்க வேண்டும்.
சிறிய தொகையைச் செலுத்துமாறு கேட்கப்படும் செய்தியாக இருந்தாலும் அலட்சியமாக இருக்கக்கூடாது. பொதுமக்கள் விழிப்புடன் செயல்பட்டு, இத்தகைய இணைய மோசடிகளில் சிக்காமல் தங்களைப் பாதுகாத்துக்கொள்ள வேண்டும்.
Follow us on :
Premium Job Link:https://www.sgtamilan.com/product/premium-member-ship
WHATSAPP CHANNEL LINK