சிங்கப்பூர் சாலைகளில் தானியங்கி வாகனங்கள்... பாதுகாப்பு குறித்து எழுந்த கேள்வி! LTA வெளியிட்ட முக்கிய அறிவிப்பு!
சிங்கப்பூரில் தானியங்கி முறையில் இயங்கும் வாகனங்கள் (Autonomous Vehicles) தொடர்பாக எழுந்துள்ள பாதுகாப்புக் கவலைகளைத் தொடர்ந்து, அவற்றைக் கண்காணிக்கவும் விபத்துகளைக் கையாளவும் புதிய நடைமுறைகள் அமலில் இருப்பதாக நிலப் போக்குவரத்து ஆணையமான LTA தெரிவித்துள்ளது.
குறிப்பாக, Punggol பகுதியில் தானியங்கி வாகனங்கள் தொடர்பான சில சம்பவங்கள் கவனத்தை ஈர்த்துள்ளன. தானியங்கி வாகனங்கள் சாலைகளில் செல்லும்போது எதிர்பாராத விதமாக நிற்பது, போக்குவரத்துச் சூழல்களுக்கு ஏற்ப செயல்படுவதில் சிக்கல்கள் ஏற்படுவது போன்ற காணொளிகள் இணையத்தில் பரவி வருகின்றன. இதனால் இத்தகைய வாகனங்களின் பாதுகாப்பு குறித்து பொதுமக்களிடையே கேள்விகள் எழுந்துள்ளன.
இதற்குப் பதிலளித்த LTA, தானியங்கி வாகனங்கள் சம்பந்தப்பட்ட விபத்துகளைக் கையாள்வதற்காக சிங்கப்பூர் காவல்துறையுடன் இணைந்து சிறப்பு நடைமுறைகளை உருவாக்கியுள்ளதாகக் குறிப்பிட்டுள்ளது. மேலும், இணையத்தில் வெளியாகியுள்ள காணொளிகளில் இடம்பெற்ற சம்பவங்கள் குறித்தும் தங்களுக்குத் தெரியவந்துள்ளதாகத் தெரிவித்துள்ளது.
சம்பந்தப்பட்ட தானியங்கி வாகன நிறுவனங்களுடன் இணைந்து ஒவ்வொரு சம்பவத்தையும் ஆய்வு செய்து, அதன் காரணங்களைக் கண்டறிவதுடன் தேவையான பாதுகாப்பு மேம்பாடுகளும் மேற்கொள்ளப்படுவதாக LTA விளக்கியுள்ளது.
மேலும், பொதுச் சாலைகளில் தானியங்கி வாகனங்களை இயக்க அனுமதி பெற்றுள்ள அனைத்து நிறுவனங்களும் கட்டாயமாகப் பொறுப்புக் காப்பீடு வைத்திருக்க வேண்டும் என LTA தெரிவித்துள்ளது. இந்தக் காப்பீடு, வாகனங்களால் ஏற்படக்கூடிய மூன்றாம் தரப்பினரின் உயிரிழப்பு, உடல் காயம் மற்றும் சொத்துச் சேதம் போன்றவற்றை உள்ளடக்கும்.
நிறுவனங்கள் பாதுகாப்பு விதிமுறைகளைப் பின்பற்றத் தவறினால், அவற்றுக்கு எதிராக நடவடிக்கை எடுக்கப்படும் என்றும் LTA எச்சரித்துள்ளது. தேவையான திருத்தங்களைச் செய்ய உத்தரவிடுவது மட்டுமின்றி, தானியங்கி வாகனங்களை இயக்குவதற்கான அனுமதியைத் தற்காலிகமாக நிறுத்தவோ அல்லது ரத்து செய்யவோ அதிகாரம் இருப்பதாகவும் குறிப்பிட்டுள்ளது.
இதற்கிடையில், Punggol பகுதியில் நடைபெற்று வரும் தானியங்கி ஷட்டில் சேவையின் சோதனை ஓட்டங்களின்போது பாதுகாப்பு அதிகாரி ஒருவர் வாகனத்திற்குள் இருந்து கண்காணிப்பார். இதன் மூலம் உள்ளூர் சாலைச் சூழலுக்கு ஏற்ப வாகனங்களின் செயல்பாடுகளை ஆய்வு செய்து, தேவையான மாற்றங்களை மேற்கொள்ள முடியும் எனத் தெரிவிக்கப்பட்டுள்ளது.
மேலும், தானியங்கி வாகனங்களின் பயன்பாடு மற்றும் செயல்பாடுகள் குறித்த தகவல்களைப் பொதுமக்களுடன் பகிர்ந்துகொள்ளும் வகையில், அடுத்த மாதம் முதல் மூன்று மாதங்களுக்கு ஒருமுறை காலாண்டு அறிக்கைகளை வெளியிட LTA திட்டமிட்டுள்ளது.
சிங்கப்பூரில் தானியங்கி வாகனங்களின் பயன்பாடு படிப்படியாக அதிகரித்து வரும் நிலையில், அவற்றின் பாதுகாப்பை உறுதிப்படுத்தவும் பொதுமக்களின் நம்பிக்கையைப் பெறவும் LTA தொடர்ந்து நடவடிக்கைகளை மேற்கொண்டு வருகிறது.
Follow us on :
Premium Job Link:https://www.sgtamilan.com/product/premium-member-ship
WHATSAPP CHANNEL LINK