ஆர்ச்சர்ட் சாலையில் கட்டுப்பாட்டை இழந்த கார்..!! நடைபாதையில் மோதியதில் 25 வயது பெண் காயம்..!!
சிங்கப்பூரின் பரபரப்பான ஆர்ச்சர்ட் சாலை மற்றும் கிரேஞ்ச் சாலை சந்திப்பில், ஆகஸ்ட் 5 ஆம் தேதியன்று மதிய நேரத்தில் சாலை விபத்து ஒன்று நிகழ்ந்துள்ளது.
சாலையில் சென்று கொண்டிருந்த கார் கட்டுப்பாட்டை இழந்து, நடைபாதையில் ஏறி, போக்குவரத்து கட்டுப்பாட்டுப் பெட்டியில் மோதியதில் விபத்துக்குள்ளாகியது.
இந்த விபத்தில், 25 வயதுடைய பெண் ஒருவர் காயமடைந்தார். சம்பவ இடத்திற்கு விரைந்த சிங்கப்பூர் குடிமைத் தற்காப்புப் படை (SCDF) அதிகாரிகள், அவருக்கு முதலுதவி அளித்து, மேல்சிகிச்சைக்காக ராஃபிள்ஸ் மருத்துவமனைக்கு அனுப்பி வைத்தனர். அவரது உடல்நிலை குறித்து அதிகாரப்பூர்வ தகவல் எதுவும் வெளியாகவில்லை.
இந்த சம்பவம் குறித்த காணொளி ஒன்றை, @totan29102024 என்ற பயனர் தனது இன்ஸ்டாகிராம் பக்கத்தில் பதிவிட்டுள்ளார். அந்த பதிவில் விபத்துக்கு பிறகு அந்த கார் நடைபாதையில் நிற்பதும், அதன் முன் பகுதி சாலையோரத்தில் இருந்த போக்குவரத்து கட்டுப்பாட்டு பெட்டியில் மோதியதும் மற்றும் அதன் பின்பகுதிப் புல்வெளியில் இருப்பதும் தெரிகிறது.
விபத்தில் தொடர்புடைய காரை 20 வயதுடைய இளைஞர் ஓட்டி வந்ததாக காவல்துறை தெரிவித்துள்ளது. அவர் சம்பவம் தொடர்பான விசாரணைக்கு முழுமையாக ஒத்துழைத்து வருவதாகவும் காவல்துறை கூறியுள்ளது.
விபத்துக்கான சரியான காரணம் இன்னும் உறுதி செய்யப்படாத நிலையில், கார் எவ்வாறு கட்டுப்பாட்டை இழந்தது என்பது குறித்து காவல்துறை தொடர்ந்து விசாரணை நடத்தி வருகிறது.
இந்த சம்பவம், மக்கள் அதிகம் நடமாடும் ஆர்ச்சர்ட் சாலை பகுதியில் நடந்ததால், சிறிது நேரம் போக்குவரத்து பாதிக்கப்பட்டது. சம்பவ இடத்தை அதிகாரிகள் விரைவாக சீரமைத்து, போக்குவரத்தை வழக்கமான நிலைக்கு கொண்டு வந்தனர்.
Follow us on : click here
Premium Job Link:https://www.sgtamilan.com/product/premium-member-ship
WHATSAPP CHANNEL LINK