சிங்கப்பூரில் திடீர் அதிர்ச்சி! கோழியை விழுங்கிய மலைப்பாம்பு… அடுத்து நடந்தது என்ன?
சிங்கப்பூரின் வெஸ்ட் கோஸ்ட் டிரைவ் பகுதியில், மலைப்பாம்பு ஒன்று கோழியை விழுங்கிய சம்பவம் பொதுமக்களிடையே பரபரப்பை ஏற்படுத்தியுள்ளது. திறந்தவெளி வாகன நிறுத்துமிடத்தில் நடைபெற்ற இந்தச் சம்பவத்தைக் காணப் பலர் அங்கு திரண்டனர்.
கடந்த அக்டோபர் 25ஆம் தேதி வெளியான 8World செய்தியின்படி, வெஸ்ட் கோஸ்ட் டிரைவ் பகுதியில் உள்ள 501ஆம் எண் கட்டடத்திற்கு அருகிலுள்ள திறந்தவெளி வாகன நிறுத்துமிடத்தில் பெரிய மலைப்பாம்பு ஒன்று காணப்பட்டது.
அந்தப் பாம்பு அருகிலிருந்த சிவப்பு நிறக் கார் உள்ளிட்ட வாகனங்களின் அருகே மெதுவாக நகர்ந்துகொண்டிருந்தது. அப்போது அது ஒரு கோழியை விழுங்கிக்கொண்டிருந்ததாகக் கூறப்படுகிறது. இதைக் கண்ட அப்பகுதி மக்கள் பலர் அங்கு திரண்டு வேடிக்கை பார்த்தனர். அப்போது சில காவல்துறை அதிகாரிகளும் அங்கு இருந்தனர்.
விலங்குகள் மற்றும் சுற்றுச்சூழல் ஆர்வலர் அமைப்பான ACRES, அந்தப் பாம்பு வலைப்பின்னல் மலைப்பாம்பு (Reticulated Python) எனத் தெரிவித்துள்ளது.
தேசியப் பூங்காக் கழகத்தின் தகவலின்படி, வலைப்பின்னல் மலைப்பாம்பு உலகிலேயே மிக நீளமான பாம்பு இனமாகும். இந்தப் பாம்புக்கு நஞ்சு கிடையாது. இருப்பினும், அதன் அளவு மற்றும் வலிமை காரணமாகப் பொதுமக்கள் அதனை நெருங்காமல் இருப்பது அவசியம்.
சிங்கப்பூரில் பெரிய பாலூட்டிகள் குறைவாக இருப்பதால், இங்குள்ள மலைப்பாம்புகள் பொதுவாக எலிகள் போன்ற சிறிய பாலூட்டிகளை உணவாகக் கொள்கின்றன. இதனால் சிங்கப்பூரில் காணப்படும் பெரும்பாலான மலைப்பாம்புகள் ஒப்பீட்டளவில் சிறிய அளவில் இருப்பதாகத் தெரிவிக்கப்பட்டுள்ளது.
பெரிய வலைப்பின்னல் மலைப்பாம்புகள் சுமார் 5 முதல் 7 மீட்டர் நீளம் வரை வளரக்கூடும். இவை பொதுவாக இரவு நேரங்களில் சுறுசுறுப்பாக இயங்கும். மேலும், நீந்தும் திறன் கொண்டிருப்பதால் வடிகால் அமைப்புகள் வழியாகவும் நகரக்கூடும்.
குடியிருப்புப் பகுதிகளில் பாம்புகள் தென்பட்டால் அவற்றை நெருங்கவோ, பிடிக்க முயற்சிக்கவோ கூடாது. பாதுகாப்பான தூரத்தில் விலகி நின்று, சம்பந்தப்பட்ட அதிகாரிகளுக்குத் தகவல் தெரிவிப்பது நல்லது.
Follow us on :
Premium Job Link:https://www.sgtamilan.com/product/premium-member-ship
WHATSAPP CHANNEL LINK