சிங்கப்பூரில் அரசு அதிகாரி போல் நடித்து மோசடி! S$10,000 நகைகளைப் பறித்த மலேசியர் 6 மணி நேரத்தில் கைது!
சிங்கப்பூரில் அரசு அதிகாரி போல் நடித்து மோசடியில் ஈடுபட்டதாகச் சந்தேகிக்கப்படும் 33 வயது மலேசிய நபர் கைது செய்யப்பட்டுள்ளார். 61 வயதுப் பெண்ணிடம் சுமார் S$10,000 மதிப்புள்ள தங்க நகைகள் மற்றும் விலைமதிப்புள்ள பொருட்கள் பெறப்பட்ட சம்பவம் தொடர்பில் அவர் கைது செய்யப்பட்டதாகக் காவல்துறை தெரிவித்துள்ளது.
அக்டோபர் 8ஆம் தேதி, 61 வயதுப் பெண் ஒருவர் காவல்துறையில் புகார் அளித்தார். அவருக்கு DBS வங்கி ஊழியர் போல் ஒருவர் தொலைபேசியில் தொடர்புகொண்டு, அவரது வங்கிக் கணக்கில் அனுமதியற்ற பரிவர்த்தனைகள் நடைபெற்றுள்ளதாகக் கூறியுள்ளார்.
மேலும், இந்த விவகாரம் தொடர்பாக மத்திய போதைப்பொருள் ஒழிப்புப் பிரிவு அதிகாரியைத் தொடர்புகொள்ளுமாறு அந்தப் பெண்ணிடம் தெரிவிக்கப்பட்டுள்ளது.
அதனை நம்பிய பெண், வழங்கப்பட்ட தொலைபேசி எண்ணைத் தொடர்புகொண்டபோது, அதிகாரி போல் பேசிய நபர் அவரது வங்கிக் கணக்கு விசாரணைக்கு உட்படுத்தப்பட்டுள்ளதாகக் கூறியுள்ளார். விசாரணைக்கு ஒத்துழைக்க வேண்டும் என்றும், விலைமதிப்புள்ள பொருட்களை ஒப்படைக்க வேண்டும் என்றும் அறிவுறுத்தியுள்ளார்.
அந்த நபரின் பேச்சை நம்பிய பெண், சுமார் S$10,000 மதிப்புள்ள தங்க நகைகள் மற்றும் பிற விலைமதிப்புள்ள பொருட்களை அடையாளம் தெரியாத ஓர் நபரிடம் ஒப்படைத்துள்ளார்.
பின்னர் தான் மோசடிக்கு ஆளானதை உணர்ந்த பெண் காவல்துறையிடம் புகார் அளித்தார்.
புகாரைத் தொடர்ந்து காவல்துறையினர் விசாரணை மேற்கொண்டனர். குடிநுழைவு மற்றும் சோதனைச்சாவடிகள் ஆணையம் (ICA) , காவல்துறை செயல்பாட்டுக் கட்டுப்பாட்டு மையம் ஆகியவற்றின் உதவியுடன் சந்தேக நபரின் அடையாளம் கண்டறியப்பட்டது.
புகார் அளிக்கப்பட்ட ஆறு மணி நேரத்திற்குள் 33 வயது மலேசிய நபர் கைது செய்யப்பட்டார்.
முதற்கட்ட விசாரணையில், அடையாளம் தெரியாத நபர்களின் அறிவுறுத்தலின்படி அவர் மோசடிக்கு ஆளானவர்களிடமிருந்து பணம் அல்லது விலைமதிப்புள்ள பொருட்களைப் பெற்று, மற்ற நபர்களிடம் ஒப்படைக்கும் பணியில் ஈடுபட்டிருந்ததாகத் தெரியவந்துள்ளது.
குற்றத்தின் மூலம் கிடைத்த ஆதாயத்தை மற்றவர்கள் வைத்திருக்க உதவியதாக, ஊழல், போதைப்பொருள் கடத்தல் மற்றும் கடுமையான குற்றங்கள் (சொத்துப் பறிமுதல்) சட்டத்தின் பிரிவு 51-ன் கீழ் அந்த நபர் மீது அக்டோபர் 10ஆம் தேதி குற்றச்சாட்டு பதிவு செய்யப்படவுள்ளது.
குற்றம் நிரூபிக்கப்பட்டால், அவருக்கு அதிகபட்சம் 10 ஆண்டுகள் சிறைத்தண்டனை அல்லது S$500,000 வரை அபராதம் அல்லது இரண்டும் விதிக்கப்படலாம்.
பொதுமக்களுக்கு எச்சரிக்கை: வங்கி அல்லது அரசு அமைப்பின் அதிகாரி எனக் கூறி யாராவது தொலைபேசியில் தொடர்புகொண்டு, விசாரணைக்காக நகைகள், பணம் அல்லது பிற விலைமதிப்புள்ள பொருட்களை ஒப்படைக்கச் சொன்னால் எச்சரிக்கையாக இருங்கள். அழைப்பாளரின் அடையாளத்தைச் சுயமாகச் சரிபார்க்காமல் எந்தப் பொருளையும் ஒப்படைக்க வேண்டாம்.
Follow us on :
Premium Job Link:https://www.sgtamilan.com/product/premium-member-ship
WHATSAPP CHANNEL LINK