Scoot விமானக் கழிவறையில் ரகசியக் கேமரா..! பணிப்பெண் கண்டுபிடித்ததால் சிக்கிய பிரிட்டிஷ் ஆடவர்!
ஜப்பானிலிருந்து சிங்கப்பூருக்குப் பயணம் செய்த Scoot விமானத்தின் கழிவறையில் ரகசியக் கேமராவை மறைத்து வைத்ததாக 52 வயது பிரிட்டிஷ் ஆடவர் ஒருவர் மீது குற்றம் சுமத்தப்பட்டுள்ளது. மேலும், சம்பவம் தொடர்பான ஆதாரங்களை அழித்ததாகவும் அவர் மீது மற்றொரு குற்றச்சாட்டு பதிவு செய்யப்பட்டுள்ளது.
பிரிட்டனைச் சேர்ந்த ஹியூ லட்லி (Hugh Lutley) என்பவர் மீது, அந்தரங்கத்தைப் படம்பிடித்தல் மற்றும் நீதியைத் தடுக்கும் வகையில் ஆதாரங்களை அழித்தல் ஆகிய இரண்டு குற்றச்சாட்டுகள் சுமத்தப்பட்டுள்ளன.
கடந்த அக்டோபர் 7ஆம் தேதி ஜப்பானின் ஒசாகா நகரிலிருந்து சிங்கப்பூருக்குப் புறப்பட்ட Scoot விமானம் TR821-இல் இந்தச் சம்பவம் நிகழ்ந்ததாகக் கூறப்படுகிறது.
விமானத்தின் கழிவறை ஒன்றில் அவர் ரகசியக் கேமராவை மறைத்து வைத்திருந்ததாகக் காவல்துறையின் முதற்கட்ட விசாரணையில் தெரியவந்தது.
அதன்பின்னர், விமானப் பணிப்பெண் ஒருவர் அந்தக் கழிவறையைப் பயன்படுத்தச் சென்றபோது மறைத்து வைக்கப்பட்டிருந்த கேமராவைக் கண்டுபிடித்துள்ளார். உடனடியாக அதனை அகற்றிய அவர், சக ஊழியரிடம் தகவல் தெரிவித்துள்ளார்.
இதற்கிடையே, மறைத்து வைக்கப்பட்ட கேமராவை மீண்டும் எடுக்க முயன்றபோது அது ஏற்கெனவே அகற்றப்பட்டிருப்பதை அந்த ஆடவர் உணர்ந்ததாகக் கூறப்படுகிறது.
இதையடுத்து, தனது கைப்பேசியில் இருந்த செயலியையும் அதனுடன் தொடர்புடைய புகைப்படங்களையும் அழித்ததாகக் காவல்துறை தெரிவித்துள்ளது.
விமானம் சிங்கப்பூரின் சாங்கி விமான நிலையத்தை வந்தடைந்ததும், விசாரணைக்காக அந்த ஆடவர் தடுத்து வைக்கப்பட்டார். அவரிடமிருந்த கைப்பேசி மற்றும் கேமரா ஆகியவை ஆதாரங்களாகப் பறிமுதல் செய்யப்பட்டன.
அந்தரங்கத்தைப் படம்பிடித்த குற்றம் நிரூபிக்கப்பட்டால், அதிகபட்சம் இரண்டு ஆண்டுகள் சிறை, அபராதம், பிரம்படி அல்லது இவற்றில் ஒன்றுக்கு மேற்பட்ட தண்டனைகள் விதிக்கப்படலாம்.
அதேபோல், நீதியைத் தடுக்கும் வகையில் ஆதாரங்களை அழித்த குற்றம் நிரூபிக்கப்பட்டால், அதிகபட்சம் ஏழு ஆண்டுகள் சிறை, அபராதம் அல்லது இரண்டும் விதிக்கப்படலாம்.
இந்த வழக்கில் நவம்பர் 5ஆம் தேதி அவர் நீதிமன்றத்தில் குற்றச்சாட்டுகளை எதிர்கொண்டார். குற்றத்தை ஒப்புக்கொள்ளத் தயாராக இருப்பதாக அவர் தெரிவித்ததைத் தொடர்ந்து, S$10,000 பிணையில் விடுவிக்கப்பட்டார். அடுத்தகட்ட விசாரணைக்கான முன் விசாரணைக் கூட்டம் நவம்பர் 17ஆம் தேதிக்கு ஒத்திவைக்கப்பட்டுள்ளது.
பொதுமக்களின் தனிப்பட்ட பாதுகாப்புக்கு அச்சுறுத்தல் ஏற்படுத்தும் இத்தகைய குற்றங்கள் தொடர்பாகக் கடுமையான நடவடிக்கை எடுக்கப்படும் என்று சிங்கப்பூர் காவல்துறை தெரிவித்துள்ளது.
மேலும், இத்தகைய சம்பவங்களைக் காண நேரிட்டாலோ அல்லது பாதிக்கப்பட்டவர்கள் குறித்து தகவல் தெரிந்தாலோ உடனடியாகக் காவல்துறையிடம் புகார் அளிக்குமாறு பொதுமக்களுக்கு அறிவுறுத்தப்பட்டுள்ளது.
Follow us on :
Premium Job Link:https://www.sgtamilan.com/product/premium-member-ship
WHATSAPP CHANNEL LINK