சிங்கப்பூரில் பலரையும் வியக்க வைத்த சமூக சேவை..!!17 வயதிலேயே கவுன்சிலர் போல செயல்படும் இளைஞர்..!!
சிங்கப்பூரின் பூன் கெங்கைச் சேர்ந்த 17 வயது இளைஞர் ஜோவன் டாங், சிறு வயதிலேயே சமூகப் பணிகளில் தீவிரமாக ஈடுபட்டு பலரது கவனத்தையும் ஈர்த்துள்ளார்.
குடியிருப்பாளர்களை நேரில் சந்தித்து அவர்களின் குறைகளைக் கேட்டறிவதுடன், அப்பகுதியில் உள்ள பிரச்சினைகளைச் சம்பந்தப்பட்ட அதிகாரிகளின் கவனத்திற்குக் கொண்டு செல்கிறார். இதனால் இணையவாசிகள் சிலர் அவரை ‘இளைய கவுன்சிலர்’ என்று அழைக்கின்றனர்.
முறையான உடையில் அண்டை வீட்டாரைச் சந்தித்து உரையாடும் ஜோவன், தனது சமூகப் பணிகள் மற்றும் குடியிருப்பாளர்களுடனான சந்திப்புகளை இன்ஸ்டாகிராமில் தொடர்ந்து பகிர்ந்து வருகிறார்.
மீடியாகார்ப் நிறுவனத்தின் ‘ஜென் Z கிராஷ் கோர்ஸ்’ நிகழ்ச்சிக்காக YES 933 வானொலி தொகுப்பாளர் காவ் மெய்குய், ஜோவனுடன் பூன் கெங்கிற்குச் சென்று அவரது சமூகப் பணிகளை நேரில் பார்வையிட்டார்.
அப்போது, அப்பகுதி மக்களின் பல்வேறு பிரச்சினைகளை அவர் எடுத்துரைத்தார். குறிப்பாக, சமமற்ற நடைபாதைகளால் முதியவர்கள் கீழே விழும் அபாயம் இருப்பதாகவும், இதுகுறித்து நகர சபையின் கவனத்திற்குக் கொண்டு சென்றுள்ளதாகவும் தெரிவித்தார்.
அதேபோல், வாகனங்கள் வேகமாகச் செல்வதால் குழந்தைகள் மற்றும் முதியவர்களுக்கு ஆபத்து ஏற்படுவதாக மக்கள் புகார் தெரிவித்தனர். இதையடுத்து, பூன் கெங் MRT நிலையத்திற்கு அருகே வேகத்தடைகள் அமைக்கப்பட்டன. இதனைத் தனது முக்கியமான சாதனைகளில் ஒன்றாக அவர் கருதுகிறார்.
மேலும், புதிய BTO குடியிருப்புகள் அதிகாரப்பூர்வமாக ஒப்படைக்கப்படுவதற்கு முன்பே அப்பகுதிக்குச் சென்று, அங்கு குடியேற உள்ள மக்களுடன் கலந்துரையாடி அவர்களின் தேவைகளையும் அறிந்து வருகிறார்.
தனது சமூகப் பணிகளை இன்ஸ்டாகிராமில் காணொளிகளாகப் பதிவிட்டு வரும் அவருடைய வேகத்தடை தொடர்பான காணொளி 2.6 லட்சத்திற்கும் அதிகமான பார்வைகளைப் பெற்றுள்ளது.
ஜோவனை அப்பகுதி மக்கள் உண்மையிலேயே அறிந்திருக்கிறார்களா என்பதை அறிய, நிகழ்ச்சித் தொகுப்பாளர் காவ் மெய்குய் அவரது புகைப்படத்தைக் காட்டி பொதுமக்களிடம் கருத்துக் கேட்டார். சிலர் அவரைத் தெரியாது என்று கூறிய நிலையில், மற்றவர்கள் சமூக வலைதளங்களில் அவரது பதிவுகளைப் பார்த்திருப்பதாகத் தெரிவித்தனர். ஒரு இளைஞர் அவரது பதிவுகளை மிகவும் நேர்மறையானவை என்றும் பாராட்டினார்.
மேலும், ஜோவனின் 16 ஆண்டுகால சிறுவயது நண்பர் ஒருவர், சிறுவயதிலிருந்தே அவர் மற்றவர்களுக்கு உதவுவதில் ஆர்வம் கொண்டவர் என்றும், தற்போது சமூகப் பணிகளில் ஈடுபடுவது தனக்கு ஆச்சரியமளிக்கவில்லை என்றும் கூறினார்.
இருப்பினும், அவரது வயதைக் காரணம் காட்டி சிலர் விமர்சனங்களையும் கேலிகளையும் முன்வைத்துள்ளனர். அவர் ஒரு சட்டமன்ற உறுப்பினரைப் போல நடந்துகொள்வதாகவும், இத்தகைய பணிகளைச் செய்ய அவருக்கு அதிகாரம் இல்லை என்றும் சிலர் விமர்சித்துள்ளனர்.
இந்தக் கருத்துகள் ஆரம்பத்தில் தன்னைப் பாதித்ததாகக் கூறிய ஜோவன், பின்னர் விமர்சனங்களுக்குப் பதிலளிப்பதை விடத் தனது பணிகளில் கவனம் செலுத்துவது சிறந்தது என்பதை உணர்ந்ததாகத் தெரிவித்துள்ளார்.
தான் செய்வது சரியான பாதையில் இருக்கும் வரை மக்களுக்கு உதவுவதைத் தொடர்வேன் என்றும், அவர்களுக்கு அளித்த வாக்குறுதியை பாதியிலேயே கைவிட முடியாது என்றும் அவர் உறுதியாகக் கூறியுள்ளார்.
பூன் கெங் மட்டுமின்றி வென்கிங், டோவா பேயோ, டம்பைன்ஸ் மற்றும் லேக்சைட் உள்ளிட்ட பகுதிகளிலும் ஜோவன் சமூக நடவடிக்கைகளில் பங்கேற்று வருகிறார். 17 வயதிலேயே சமூகப் பிரச்சினைகளுக்குத் தீர்வு காண முயற்சிக்கும் அவரது செயல்பாடுகள் பலரது பாராட்டுகளையும் பெற்று வருகின்றன.
Follow us on :
Premium Job Link:https://www.sgtamilan.com/product/premium-member-ship
WHATSAPP CHANNEL LINK