சிங்கப்பூர் பேருந்தில் திடீர் வாக்குவாதம்! ஓட்டுநரை மிரட்டிய பயணி..வைரல் காணொளியால் பரபரப்பு!
சிங்கப்பூரின் ஆங் மோ கியோ பகுதியில், பேருந்து ஓட்டுநரிடம் பயணி ஒருவர் தகாத வார்த்தைகளால் பேசி, ஆத்திரத்தில் மிரட்டும் வகையில் சைகை செய்த சம்பவம் பரபரப்பை ஏற்படுத்தியுள்ளது.
இந்தச் சம்பவம் நவம்பர் 4ஆம் தேதி புதன்கிழமை, ஆங் மோ கியோ அவென்யூ 6 பகுதியில் நடைபெற்றுள்ளது. Go-Ahead Singapore நிறுவனத்தின் 136ஆம் எண் பேருந்தில் இந்தச் சம்பவம் இடம்பெற்றுள்ளது.
பேருந்து நிறுத்தத்தில் காத்திருந்த ஆண் பயணி ஒருவர், பேருந்தைச் சற்று முன்னோக்கி நகர்த்துமாறு ஓட்டுநரிடம் சைகை செய்துள்ளார். அதற்குப் பதிலளித்த ஓட்டுநர், பேருந்து நிறுத்தத்திற்குள் நுழையத் தயாராக இருப்பதால் சிறிது நேரம் காத்திருக்குமாறு சைகை மூலம் தெரிவித்துள்ளார்.
நிறுத்தத்தின் நுழைவுப் பகுதியில் கான்கிரீட் தடுப்பு இருந்ததால், பயணிகளின் பாதுகாப்பைக் கருத்தில்கொண்டு உடனடியாகப் பேருந்தின் கதவைத் திறக்க முடியவில்லை என்று நிறுவனம் விளக்கியுள்ளது.
இந்நிலையில், பேருந்தில் ஏறிய அந்தப் பயணி ஆத்திரமடைந்து ஓட்டுநரிடம் வாக்குவாதத்தில் ஈடுபட்டுள்ளார். மேலும், அவரைத் தகாத வார்த்தைகளால் திட்டியதுடன், குத்துவது போன்ற சைகையையும் செய்துள்ளார்.
சமூக ஊடகங்களில் வெளியான காணொளியில், பேருந்து சாலையில் சென்றுகொண்டிருக்கும்போதே அந்தப் பயணி ஓட்டுநருடன் வாக்குவாதத்தில் ஈடுபடுவது பதிவாகியுள்ளது. பேருந்தை ஓட்டிக்கொண்டிருந்த ஓட்டுநர், பயணியிடம் நிலைமையை விளக்க முயன்றுள்ளார்.
சுமார் இரண்டு நிமிடங்கள் நீடித்த இந்தச் சம்பவத்திற்குப் பின்னர், அந்தப் பயணி பேருந்தின் பின்பகுதிக்குச் சென்றுள்ளார். இதையடுத்து வாக்குவாதம் முடிவுக்கு வந்துள்ளது.
இந்தச் சம்பவம் குறித்து Go-Ahead Singapore நிறுவனத்தின் பேச்சாளர், பேருந்து ஓட்டுநர்களை நோக்கிய எந்தவிதமான தகாத பேச்சு மற்றும் தாக்குதல் நடத்தைகளையும் நிறுவனம் பொறுத்துக்கொள்ளாது என்று தெரிவித்துள்ளார்.
பயணிகள் பாதுகாப்பாகவும் உரிய நேரத்திலும் தங்களது இலக்கைச் சென்றடைவதை உறுதிப்படுத்த பேருந்து ஓட்டுநர்கள் கடினமாகப் பணியாற்றி வருவதாகவும் குறிப்பிட்டுள்ளார்.
மேலும், சம்பந்தப்பட்ட ஓட்டுநருக்கு நிறுவனம் முழு ஆதரவு வழங்கி வருவதாகவும் தெரிவித்துள்ளார்.
சம்பவம் தொடர்பான முழு விவரங்களையும் அறிந்துகொள்ள கண்காணிப்புக் கேமரா பதிவுகள் உள்ளிட்ட ஆதாரங்கள் ஆய்வு செய்யப்பட்டு வருகின்றன. தேவைப்பட்டால் இந்த விவகாரம் தொடர்புடைய அதிகாரிகளிடம் ஒப்படைக்கப்படும் என்றும் நிறுவனம் தெரிவித்துள்ளது.
பொதுப் போக்குவரத்துச் சேவையில் பணியாற்றும் ஊழியர்களிடம் பயணிகள் மரியாதையுடன் நடந்துகொள்ள வேண்டியதன் அவசியத்தை இந்தச் சம்பவம் மீண்டும் எடுத்துக்காட்டியுள்ளது.
Follow us on :
Premium Job Link:https://www.sgtamilan.com/product/premium-member-ship
WHATSAPP CHANNEL LINK