சிங்கப்பூரில் 124 இ-சிகரெட் குப்பிகள் பறிமுதல்..!! 38 வயது ஆடவர் மீது குற்றச்சாட்டு!
சிங்கப்பூரில் எட்டோமிடேட் (Etomidate) எனும் பொருள் அடங்கிய இ-சிகரெட் குப்பிகளைச் சட்டவிரோதமாக விநியோகித்ததாகச் சந்தேகிக்கப்படும் 38 வயது ஆடவர் மீது சுகாதார அறிவியல் ஆணையம் (HSA) குற்றஞ்சாட்டியுள்ளது. இந்தச் சம்பவம் தொடர்பாக மொத்தம் 124 இ-சிகரெட் குப்பிகள் கைப்பற்றப்பட்டுள்ளன.
Ong Zhiyong Jeremy என்ற 38 வயது ஆடவர், அக்டோபர் 20ஆம் தேதி சிங்கப்பூரின் ஜூரோங் ஈஸ்ட் பகுதியில் காவல்துறையினர் மேற்கொண்ட அமலாக்க நடவடிக்கையின்போது பிடிபட்டார்.
அப்போது அவரிடம் இருந்த உறையில் மூன்று இ-சிகரெட் குப்பிகள் கண்டுபிடிக்கப்பட்டன. தொடர்ந்து, அவரது கையிலிருந்த சிறிய பை மற்றும் மோட்டார் சைக்கிளில் மேற்கொள்ளப்பட்ட சோதனையில் மேலும் 121 குப்பிகள் கைப்பற்றப்பட்டன. இதன் மூலம் மொத்தம் 124 இ-சிகரெட் குப்பிகள் பறிமுதல் செய்யப்பட்டன.
பின்னர், இந்தச் சம்பவம் தொடர்பான விசாரணையைச் சுகாதார அறிவியல் ஆணையம் பொறுப்பேற்றது. கைப்பற்றப்பட்ட குப்பிகளை ஆய்வகத்தில் பரிசோதித்தபோது, அவற்றில் எட்டோமிடேட் என்ற பொருள் இருப்பது உறுதிப்படுத்தப்பட்டது.
சம்பவம் நடைபெற்றபோது அந்த ஆடவர் விநியோகப் பணியில் ஈடுபட்டிருந்ததாகத் தெரிவிக்கப்பட்டுள்ளது. கைப்பற்றப்பட்ட இ-சிகரெட் குப்பிகளை வாடிக்கையாளர்களிடம் கொண்டு சேர்ப்பதற்காக அவர் வைத்திருந்ததாகச் சந்தேகிக்கப்படுகிறது.
மேலும் விசாரணைக்கு உதவும் வகையில் அவர் ஒரு வாரம் தடுப்புக் காவலில் வைக்கப்பட்டிருந்தார். இதனைத் தொடர்ந்து, 1993ஆம் ஆண்டின் புகையிலை மற்றும் இ-சிகரெட் கட்டுப்பாட்டுச் சட்டத்தின் கீழ், அக்டோபர் 22ஆம் தேதி அவர் மீது குற்றஞ்சாட்டப்பட்டது.
அக்டோபர் 29ஆம் தேதி இந்த வழக்கு மீண்டும் நீதிமன்றத்தில் விசாரணைக்கு வந்தது. பின்னர், வழக்கின் அடுத்த விசாரணை 2026ஆம் ஆண்டு டிசம்பர் 10ஆம் தேதிக்கு ஒத்திவைக்கப்பட்டது.
சிங்கப்பூரில் இ-சிகரெட் மற்றும் எட்டோமிடேட் தொடர்பான குற்றங்களைத் தீவிரமாகக் கருதுவதாகச் சுகாதார அறிவியல் ஆணையம் தெரிவித்துள்ளது.
சிங்கப்பூரின் சட்டத்தின்படி, எட்டோமிடேட் மற்றும் அதனை ஒத்த பொருட்கள் குறிப்பிட்ட மனநிலையைப் பாதிக்கக்கூடிய பொருட்களாக வகைப்படுத்தப்பட்டுள்ளன.
இவற்றை இறக்குமதி செய்த குற்றம் நிரூபிக்கப்பட்டால், மூன்று முதல் 20 ஆண்டுகள் வரை சிறைத்தண்டனையும் ஐந்து முதல் 15 பிரம்படிகள் வரையும் விதிக்கப்படலாம். அதேபோல், இவற்றைக் கடத்தி விநியோகித்த குற்றம் நிரூபிக்கப்பட்டால், இரண்டு முதல் 10 ஆண்டுகள் வரை சிறைத்தண்டனையும் இரண்டு முதல் ஐந்து பிரம்படிகள் வரையும் விதிக்கப்படலாம் என ஆணையம் தெரிவித்துள்ளது.
சிங்கப்பூரில் சட்டவிரோத இ-சிகரெட் விநியோகத்தைக் கட்டுப்படுத்த அதிகாரிகள் தொடர்ந்து நடவடிக்கை எடுத்து வரும் நிலையில், இந்த வழக்கின் அடுத்தகட்ட விசாரணை டிசம்பர் 10ஆம் தேதி நடைபெறவுள்ளது.
Follow us on :
Premium Job Link:https://www.sgtamilan.com/product/premium-member-ship
WHATSAPP CHANNEL LINK