சிங்கப்பூர் பெயரிலேயே எழுத்துப்பிழை..!! NTU அறிவிப்புப் பலகை குறித்து இணையவாசிகள் அதிர்ச்சி..!!
சிங்கப்பூர் :சிங்கப்பூரின் நான்யாங் தொழில்நுட்பப் பல்கலைக்கழகமான NTU-வில் புதிதாக நிறுவப்பட்ட அறிவிப்புப் பலகை ஒன்றில், நாட்டின் ஆங்கிலப் பெயரான “Singapore” என்பதற்குப் பதிலாக “Sinopore” எனத் தவறாக எழுதப்பட்டிருந்த சம்பவம் இணையத்தில் கவனம் பெற்றுள்ளது.
NTU வளாகத்தில் அமைக்கப்பட்டிருந்த அந்த அறிவிப்புப் பலகையின் புகைப்படத்தை, சீன சமூக ஊடகத் தளமான சியாவோஹாங்ஷு வில் இணையவாசி ஒருவர் சமீபத்தில் பதிவிட்டிருந்தார்.
அந்தப் பதிவில், சிங்கப்பூரின் பெயர் தவறாக எழுதப்பட்டிருப்பதைச் சுட்டிக்காட்டி, பலகையின் மறுபுறத்தில் பெயர் சரியாக எழுதப்பட்டிருப்பதாகவும் குறிப்பிடப்பட்டிருந்தது.
இந்தப் பதிவு வெளியான ஒரே நாளில் 1,000-க்கும் மேற்பட்ட விருப்பங்களையும், 200-க்கும் அதிகமான கருத்துகளையும் பெற்றது. இதையடுத்து, பல்கலைக்கழகத்தின் அறிவிப்புப் பலகையில் இடம்பெற்றிருந்த எழுத்துப்பிழை இணையவாசிகளிடையே பரவலாகப் பேசப்பட்டது.
இதனிடையே, புதியதாக நிறுவப்பட்ட அறிவிப்புப் பலகையில் எழுத்துப்பிழை இடம்பெற்றிருந்ததை நான்யாங் தொழில்நுட்பப் பல்கலைக்கழகத்தின் செய்தித் தொடர்பாளர் உறுதிப்படுத்தியுள்ளார்.
எனினும், அந்தத் தவறு தற்போது சரிசெய்யப்பட்டுவிட்டதாக பல்கலைக்கழகம் தெரிவித்துள்ளது. இதனால், சமூக ஊடகங்களில் பரவிய புகைப்படத்தில் காணப்பட்ட “Sinopore” என்ற தவறான எழுத்து தற்போது பலகையில் இல்லை எனத் தெரிவிக்கப்பட்டுள்ளது.
சம்பவம் தொடர்பாக இணையவாசிகள் பல்வேறு கருத்துகளைப் பதிவிட்ட நிலையில், சிலர் இதனை வெறுமனே ஒரு அச்சு அல்லது தயாரிப்பு தொடர்பான தவறு எனக் குறிப்பிட்டுள்ளனர்.
ஒரு சிறிய எழுத்துப்பிழையாக இருந்தாலும், நாட்டின் பெயரே தவறாக எழுதப்பட்டிருந்ததால் இந்தச் சம்பவம் சமூக ஊடகங்களில் குறிப்பிடத்தக்க கவனத்தைப் பெற்றுள்ளது.
Follow us on : click here
Premium Job Link:https://www.sgtamilan.com/product/premium-member-ship
WHATSAPP CHANNEL LINK