சைக்கிள் மோதியதில் உயிரிழந்த 74 வயது முதியவர்..!! 16 வயது சைக்கிள் ஓட்டுநர் கைது..!!
சிங்கப்பூர் யிஷூன் பகுதியில் சைக்கிள் மோதியதில் காயமடைந்த 74 வயது முதியவர் மருத்துவமனையில் சிகிச்சை பலனின்றி உயிரிழந்தார். இந்தச் சம்பவம் தொடர்பாக 16 வயது சைக்கிள் ஓட்டுநர் ஒருவர் கைது செய்யப்பட்டுள்ளார்.
செப்டம்பர் 15ஆம் தேதி மதியம் யிஷூன் 5-வது அவென்யூவில் உள்ள பிளாக் 741 அருகே இந்தச் சம்பவம் நடந்துள்ளது. காலை 11:45 மணியளவில் சம்பவம் தொடர்பாக காவல்துறைக்கு தகவல் கிடைத்ததாக தெரிவிக்கப்பட்டுள்ளது.
74 வயதான சென் லியாங் குவாங் (Chen Liang Guang) என்ற முதியவர் சைக்கிள் மோதியதில் படுகாயமடைந்ததாக அவரது குடும்பத்தினர் தெரிவித்துள்ளனர். அவருக்கு மூளையில் ரத்தக்கசிவு மற்றும் மண்டை ஓட்டில் எலும்பு முறிவு ஏற்பட்டிருந்ததாக கூறப்படுகிறது.
சம்பவத்துக்குப் பிறகு, அவரை மருத்துவமனைக்கு அழைத்துச் செல்ல உதவிய நபரையும், விபத்தை நேரில் பார்த்த சாட்சிகளையும் கண்டுபிடிக்க அவரது குடும்பத்தினர் சமூக வலைத்தளங்களில் உதவி கோரியிருந்தனர்.
பின்னர் செப்டம்பர் 17ஆம் தேதி, முதியவர் சிகிச்சை பலனின்றி உயிரிழந்துவிட்டதாக அவரது மகன் சமூக வலைத்தளத்தில் தெரிவித்தார்.
காவல்துறையின் தகவலின்படி, சம்பவத்தின்போது முதியவர் சுயநினைவுடன் மருத்துவமனைக்கு கொண்டு செல்லப்பட்டார். பின்னர் அவர் உயிரிழந்தார்.
இந்தச் சம்பவத்தில், மற்றொருவரின் மரணத்துக்கு காரணமான வகையில் கவனக்குறைவாக சைக்கிள் ஓட்டியதாக சந்தேகிக்கப்படும் 16 வயது சிறுவன் கைது செய்யப்பட்டுள்ளார்.
இந்த சம்பவம் குறித்து காவல்துறை தொடர்ந்து விசாரணை நடத்தி வருகிறது. சைக்கிள் ஓட்டுநர்களும் சாலைப் பயணிகளும் கூடுதல் கவனத்துடன் செயல்பட வேண்டியதன் அவசியத்தை இந்த சம்பவம் மீண்டும் உணர்த்தியுள்ளது. உயிரிழந்த முதியவரின் குடும்பத்தினருக்கு பலரும் இரங்கல் தெரிவித்து வருகின்றனர்.
Follow us on : click here
Premium Job Link:https://www.sgtamilan.com/product/premium-member-ship
WHATSAPP CHANNEL LINK