சிங்கப்பூரில் பேருந்து ஓட்டுநர் மீது மீண்டும் தாக்குதல்..! 3 மாதங்களில் 2வது சம்பவம்..!!
சிங்கப்பூர்: சிங்கப்பூரில் பணியில் இருந்த ‘கோ-அஹெட்’ பேருந்து ஓட்டுநர் ஒருவர் பயணியால் தாக்கப்பட்ட சம்பவம் அதிர்ச்சியை ஏற்படுத்தியுள்ளது. கடந்த 3 மாதங்களில் அந்நிறுவனத்தின் பேருந்து ஓட்டுநர் ஒருவர் பணி நேரத்தில் தாக்கப்படுவது இது 2-வது முறையாகும்.
சாங்கி வில்லேஜ் முனையத்திலிருந்து கம்போங் பாரு முனையம் நோக்கிச் சென்றுகொண்டிருந்த கோ-அஹெட் சேவை எண் 2 பேருந்தில் இந்தச் சம்பவம் இடம்பெற்றுள்ளது.
ஆகஸ்ட் 16ஆம் தேதி நடந்த சம்பவம்:
ஆகஸ்ட் 16ஆம் தேதி பிற்பகல் சுமார் 5.20 மணியளவில் , பேருந்தை ஓட்டிச் சென்றுகொண்டிருந்த ஓட்டுநர் ஒருவர் பயணியால் தாக்கப்பட்டதாக ‘கோ-அஹெட்’ நிறுவனம் தெரிவித்துள்ளது.
இந்தச் சம்பவம் தொடர்பான தகவலை நிறுவனம் ஆகஸ்ட் 27ஆம் தேதி தனது ஃபேஸ்புக் பக்கத்தில் வெளியிட்டது. தாக்குதலின் காரணமாக பேருந்துச் சேவை பாதிக்கப்பட்டதுடன், காயமடைந்த ஓட்டுநர் சாங்கி பொது மருத்துவமனையில் சிகிச்சைக்காக அனுமதிக்கப்பட்டார்.
சிகிச்சைக்குப் பின்னர் ஓட்டுநர் தற்போது மீண்டும் பணிக்குத் திரும்பியுள்ளார். அவருக்கு நிறுவனத்தின் சார்பில் முழுமையான ஆதரவு வழங்கப்பட்டு வருவதாகவும் தெரிவிக்கப்பட்டுள்ளது.
சம்பவம் தொடர்பாக ‘கோ-அஹெட்’ நிறுவனம் காவல்துறையில் புகார் அளித்துள்ளது. பணியில் இருக்கும் பொதுப் போக்குவரத்து ஊழியர்களின் பாதுகாப்பு தொடர்பாக நிறுவனம் தீவிர கவனம் செலுத்தி வருவதாகவும் கூறப்பட்டுள்ளது.
பேருந்து ஓட்டுநர்கள் உள்ளிட்ட பொதுப் போக்குவரத்து ஊழியர்கள் அனைவரும் மரியாதையுடன் நடத்தப்பட வேண்டும் என்றும், அவர்கள் பணியில் இருக்கும்போது வன்முறை அல்லது வசைபாடுகளை எதிர்கொள்ளக் கூடாது என்றும் ‘கோ-அஹெட்’ வலியுறுத்தியுள்ளது.
3 மாதங்களில் 2வது தாக்குதல்:
குறிப்பாக, கடந்த 3 மாதங்களில் ‘கோ-அஹெட்’ பேருந்து ஓட்டுநர் ஒருவர் பணி நேரத்தில் தாக்கப்படுவது இது 2-வது சம்பவம் என்பது குறிப்பிடத்தக்கது.
இதற்கு முன்னதாக மே 23ஆம் தேதி, இதே சேவை எண் 2 பேருந்தை ஓட்டிச் சென்ற மற்றொரு ஓட்டுநர் பயணி ஒருவரால் தாக்கப்பட்டிருந்தார். அந்தப் பயணி இறங்க வேண்டிய இடத்தைத் தவறவிட்டதால் ஏற்பட்ட கோபத்தில், ஓட்டுநரை தகாத வார்த்தைகளால் திட்டி பின்னர் தாக்கியதாக தெரிவிக்கப்பட்டது.
தொடர்ந்து ஒரே பேருந்துச் சேவையைச் சேர்ந்த ஓட்டுநர்கள் தாக்கப்படும் சம்பவங்கள் இடம்பெற்றிருப்பது, பணியில் இருக்கும் பொதுப் போக்குவரத்து ஊழியர்களின் பாதுகாப்பு குறித்து கவலையை ஏற்படுத்தியுள்ளது.
பயணிகளுக்கும் ஓட்டுநர்களுக்கும் இடையே ஏற்படும் கருத்து வேறுபாடுகள் வன்முறையாக மாறாமல், பொறுமையுடனும் மரியாதையுடனும் கையாளப்பட வேண்டும் என்பதே இச்சம்பவம் மீண்டும் உணர்த்தும் முக்கியமான செய்தியாக உள்ளது.
Follow us on : click here
Premium Job Link:https://www.sgtamilan.com/product/premium-member-ship
WHATSAPP CHANNEL LINK