சிங்கப்பூர் பெண் தொழிலதிபரிடம் ரூ.31 கோடி சூதாட்டக் கடன்?
சிங்கப்பூரில் உள்ள Marina Bay Sands கேசினோவின் VIP வாடிக்கையாளராக இருந்த பெண் தொழிலதிபர் ஒருவர், 2011ஆம் ஆண்டு மக்காவ் வெனீஷியன் கேசினோவுக்கு அறிமுகப்படுத்தப்பட்டுள்ளார்.
அங்கு சூதாட்டத்தில் தனது அதிர்ஷ்டத்தை மேம்படுத்தலாம் என்ற நோக்கில் தொடர்ந்து சென்ற அவர், கேசினோவிடம் இருந்து 15 மில்லியன் ஹாங்காங் டாலர் வரை கடன் பெறுவதற்கான ஒப்பந்தத்தில் கையெழுத்திட்டதாக நீதிமன்ற ஆவணங்களில் தெரிவிக்கப்பட்டுள்ளது.
அவர் 2011 முதல் 2024ஆம் ஆண்டு வரை மக்காவ் வெனீஷியன் கேசினோவுக்கு சென்று வந்துள்ளார். பின்னர் சூதாட்டக் கடன் தொடர்பாக இரு தரப்புக்கும் இடையே பிரச்சினை ஏற்பட்டது.
கேசினோ முதலில் சட்ட நோட்டீஸ் அனுப்பியதுடன், 2024 நவம்பரில் ஹாங்காங் நீதிமன்றத்திலும் வழக்கு தொடர்ந்தது. அவர் நீதிமன்றத்தில் ஆஜராகி வழக்கை எதிர்கொள்ளாததால், 2025 மார்ச் மாதம் 19.35 மில்லியன் ஹாங்காங் டாலர் (சுமார் S$3.13 மில்லியன்) கடனை செலுத்த வேண்டும் என்று தீர்ப்பு வழங்கப்பட்டது. இதனுடன் ஆண்டுக்கு 18% வட்டி மற்றும் வழக்குச் செலவுகளும் விதிக்கப்பட்டன.
இதையடுத்து, அந்த ஹாங்காங் தீர்ப்பை சிங்கப்பூரில் பதிவு செய்து அமல்படுத்த கேசினோ முயற்சி செய்தது. பெண் தொழிலதிபரின் சிங்கப்பூர் சொத்துக்களை கைப்பற்றி விற்பனை செய்து கடனை வசூலிக்கவும் நீதிமன்ற உத்தரவு பெறப்பட்டது. அந்த சொத்தின் மதிப்பு சுமார் S$3.87 மில்லியன் என தெரிவிக்கப்பட்டது.
பெண் தொழிலதிபர் ஹாங்காங் தீர்ப்பை சிங்கப்பூரில் அமல்படுத்துவதை எதிர்த்து மேல்முறையீடு செய்தார். வழக்கு விசாரணையில், சிங்கப்பூர் சட்டத்தின் கீழ் சூதாட்டக் கடனை உள்ளூர் நீதிமன்றங்கள் மூலம் வசூலிப்பது பொதுக் கொள்கைக்கு எதிரானது என்று உயர் நீதிமன்றம் குறிப்பிட்டது.
இதன் அடிப்படையில், ஹாங்காங் நீதிமன்றத் தீர்ப்பை சிங்கப்பூரில் பதிவு செய்து அமல்படுத்திய நடவடிக்கையை உயர் நீதிமன்றம் ரத்து செய்தது.
முக்கியமாக, ஹாங்காங் நீதிமன்றத்தின் தீர்ப்பு ரத்து செய்யப்படவில்லை. அந்தப் பெண் கடனை செலுத்த வேண்டியதில்லை என்றும் நீதிமன்றம் அறிவிக்கவில்லை. மாறாக, அந்த சூதாட்டக் கடனை சிங்கப்பூர் நீதிமன்றத்தின் மூலம் வசூலிக்க முடியாது என்பதே தீர்ப்பின் பொருள்.
வேறு நாடுகளில் தனது உரிமைகளை அமல்படுத்த கேசினோவுக்கு இன்னும் வாய்ப்பு இருப்பதாகவும் நீதிமன்றம் தெளிவுபடுத்தியுள்ளது.
சூதாட்டத்துக்காக வழங்கப்படும் கடன்கள் தொடர்பாக சிங்கப்பூர் நீதிமன்றங்களின் நிலைப்பாட்டை இந்த வழக்கு மீண்டும் வெளிச்சத்துக்கு கொண்டு வந்துள்ளது.
Follow us on : click here
Premium Job Link:https://www.sgtamilan.com/product/premium-member-ship
WHATSAPP CHANNEL LINK