சிங்கப்பூரில் மீண்டும் தலைதூக்கும் வேலை மோசடி..!! Pokémon கார்டுகள் பெயரில் S$71,000 சுருட்டல்..!
சிங்கப்பூரில் Pokémon உள்ளிட்ட சேகரிப்பு கார்டுகளை பயன்படுத்தி மேற்கொள்ளப்படும் ஆன்லைன் வேலை மோசடி மீண்டும் அதிகரித்து வருவதாக காவல்துறை எச்சரிக்கை விடுத்துள்ளது. கடந்த ஆகஸ்ட் 25ஆம் தேதி முதல் இதுபோன்ற மோசடி தொடர்பாக குறைந்தது 12 புகார்கள் பதிவாகியுள்ளன. இந்த சம்பவங்களில் பாதிக்கப்பட்டவர்கள் மொத்தமாக S$71,000-க்கும் மேல் பணத்தை இழந்துள்ளனர்.
இந்த மோசடியில், தெரியாத நபர்கள் பாதிக்கப்பட்டவர்களை தொலைபேசி அல்லது குறுஞ்செய்தி மூலம் தொடர்பு கொண்டு, வீட்டிலிருந்தே செய்யக்கூடிய ஆன்லைன் வேலை இருப்பதாகக் கூறுகின்றனர்.
அந்த வேலைகள் Pokémon அல்லது பிற சேகரிப்பு கார்டுகளுடன் தொடர்புடையதாக இருக்கும் என தெரிவிக்கப்படுகிறது.
பின்னர், பாதிக்கப்பட்டவர்கள் ஒரு போலியான இணையதளத்திற்கு அழைத்துச் செல்லப்படுகின்றனர். அங்கு டிஜிட்டல் கார்டு பேக்குகளை திறப்பது, குறிப்பிட்ட கார்டுகளை தேர்வு செய்வது போன்ற ஆன்லைன் பணிகளை செய்து கமிஷன் பெறலாம் என நம்ப வைக்கப்படுகின்றனர்.
மோசடிக்காரர்கள் ஆரம்பத்தில் சிறிய அளவிலான பணத்தை வருமானமாக வழங்கக்கூடும். இதனால் இணையதளம் உண்மையானது என்றும், தாங்கள் பணம் சம்பாதிக்க முடியும் என்றும் பாதிக்கப்பட்டவர்கள் நம்புகின்றனர்.
அதன் பிறகு, அதிக வருமானம் கிடைக்கும் பணிகளைச் செய்ய வேண்டும் அல்லது அடுத்த கட்டத்தைத் திறக்க வேண்டும் எனக் கூறி மேலும் பணம் செலுத்துமாறு வலியுறுத்தப்படுகின்றனர்.
சில சந்தர்ப்பங்களில் கிரிப்டோகரன்சி மூலம் பணம் செலுத்தவும் அறிவுறுத்தப்படுவதாக காவல்துறை தெரிவித்துள்ளது.
பாதிக்கப்பட்டவர்கள் பணம் செலுத்திய பிறகு, மோசடிக்காரர்கள் பல்வேறு காரணங்களைக் கூறி மீண்டும் மீண்டும் பணம் கேட்கின்றனர்.
கணக்கில் ஏற்பட்டுள்ள எதிர்மறை இருப்பை சரிசெய்ய வேண்டும், பணியை முடிக்க வேண்டும், கணக்கை மீட்டெடுக்க வேண்டும் அல்லது சம்பாதித்த பணத்தைப் பெற கூடுதல் தொகை செலுத்த வேண்டும் என கூறப்படலாம்.
இறுதியில் போலியான இணையதளத்தில் காட்டப்படும் வருமானத்தை திரும்பப் பெற முடியாதபோதுதான், தாங்கள் மோசடி செய்யப்பட்டதை பலர் உணர்கின்றனர்.
இத்தகைய ஆன்லைன் வேலை வாய்ப்புகளை நம்பி பணத்தை இழக்காமல் பொதுமக்கள் மிகவும் எச்சரிக்கையாக இருக்க வேண்டும் என சிங்கப்பூர் காவல்துறை அறிவுறுத்தியுள்ளது.
மேலும், மோசடிகளைத் தவிர்க்க “ADD, CHECK, TELL” என்ற மூன்று நடவடிக்கைகளைப் பின்பற்றுமாறு அறிவுறுத்தப்பட்டுள்ளது.
ADD – ScamShield போன்ற மோசடி தடுப்பு செயலிகளைப் பயன்படுத்துவது.
CHECK – சந்தேகத்திற்கிடமான வேலை வாய்ப்பு அல்லது தகவல்களை அதிகாரப்பூர்வ வழிகளில் சரிபார்ப்பது.
TELL – மோசடி குறித்து அதிகாரிகளுக்கும், குடும்பத்தினர் மற்றும் நண்பர்களுக்கும் உடனடியாகத் தெரிவிப்பது.
சந்தேகத்திற்கிடமான பணப் பரிவர்த்தனை ஏற்கனவே செய்யப்பட்டிருந்தால், உடனடியாக வங்கியையும் தொடர்புகொள்ளுமாறு காவல்துறை கேட்டுக்கொண்டுள்ளது.
“வீட்டிலிருந்தே எளிதாக பணம் சம்பாதிக்கலாம்” என்று கூறி முன்கூட்டியே பணம் செலுத்தச் சொன்னால், அது மோசடியாக இருக்கக்கூடும். குறிப்பாக வேலை கிடைப்பதற்காகவோ, அதிக கமிஷன் பெறுவதற்காகவோ முதலில் பணம் செலுத்த வேண்டிய சூழ்நிலை ஏற்பட்டால் மிகுந்த எச்சரிக்கையுடன் இருக்க வேண்டும்.
Follow us on : click here
Premium Job Link:https://www.sgtamilan.com/product/premium-member-ship
WHATSAPP CHANNEL LINK