சிங்கப்பூர் பேருந்துகளில் புதிய விதிமுறைகள்..!! செப்டம்பர் 23 முதல் என்னென்ன மாற்றம்?
சிங்கப்பூரில் பொதுப் பேருந்துகள் மற்றும் பேருந்து பரிமாற்ற நிலையங்கள் (Bus Interchanges), முனையங்களில் பயணிகளின் நடத்தை தொடர்பாக புதிய விதிமுறைகள் வரும் செப்டம்பர் 23, 2026 முதல் அமலுக்கு வருகின்றன.
பயணிகளுக்கு பாதுகாப்பான, அமைதியான மற்றும் அனைவருக்கும் வசதியான பொதுப் போக்குவரத்து சூழலை உருவாக்கும் நோக்கில் இந்த புதிய விதிமுறைகள் அறிமுகப்படுத்தப்படுவதாக நிலப் போக்குவரத்து ஆணையம் (LTA) தெரிவித்துள்ளது.
புதிய விதிமுறைகளின்படி, பொதுப் பேருந்துகளில் மற்ற பயணிகளுக்கு தொந்தரவு அல்லது இடையூறு ஏற்படுத்தும் சில செயல்கள் குற்றமாகக் கருதப்படும்
குறிப்பாக, 👉பேருந்தில் அதிக சத்தத்துடன் ஆடியோவை ஒலிக்கச் செய்வது
👉இருக்கைகளின் மீது கால்களை வைப்பது
👉குப்பைகளை வீசுவது
👉பேருந்துக்குள் சாப்பிடுவது அல்லது குடிப்பது
போன்ற செயல்களுக்கு அதிகபட்சமாக S$500 வரை அபராதம் விதிக்கப்படலாம்.
பேருந்து பரிமாற்ற நிலையங்கள் மற்றும் முனையங்களில் மற்ற பயணிகளுக்கு ஆபத்து அல்லது இடையூறு ஏற்படுத்தும் வகையிலான செயல்களுக்கும் கடுமையான அபராதம் விதிக்கப்படும்.
மற்ற பயணிகளின் நடமாட்டத்திற்கு தடையாக இருப்பது அல்லது அவர்களின் பாதுகாப்புக்கு ஆபத்தை ஏற்படுத்துவது, அதேபோல் பேருந்து, Bus Interchange அல்லது Terminal-ன் எந்தப் பகுதியையும் அழுக்காக்குவது அல்லது சேதப்படுத்தும் வகையில் செயல்படுவது போன்ற கடுமையான குற்றங்களுக்கு அதிகபட்சமாக S$5,000 வரை அபராதம் விதிக்கப்படலாம்.
இந்த அபராதங்கள் ஏற்கனவே ரயில் போக்குவரத்து தொடர்பான விதிமுறைகளில் உள்ள அபராதங்களுடன் ஒத்ததாக இருக்கும்.
புதிய விதிமுறைகளின் கீழ், பொதுப் பேருந்து நிறுவனங்களில் அதிகாரம் வழங்கப்பட்ட ஊழியர்கள், குறிப்பாக Ticket Inspectors மற்றும் Bus Interchange Staff, விதிமீறலில் ஈடுபட்டதாக சந்தேகிக்கப்படும் நபர்களுக்கு Administrative Notification of Offence வழங்க முடியும்.
அதன் பின்னர் சம்பவம் குறித்து LTA விசாரணை நடத்தும்.
பேருந்தை பாதுகாப்பாக இயக்குவதில் Bus Captain-களின் முக்கிய பொறுப்பு பாதிக்கப்படாமல் இருப்பதற்காக, அவர்களுக்கு Administrative Notification of Offence வழங்கும் அதிகாரம் வழங்கப்படவில்லை.
ஆனால், பயணிகள் தொந்தரவு அல்லது ஒழுங்கற்ற நடத்தையில் ஈடுபட்டால் அதை நிறுத்துமாறு அறிவுறுத்த Bus Captain-களுக்கு தொடர்ந்து அதிகாரம் உள்ளது.
அறிவுறுத்தலையும் மீறி பயணி தொடர்ந்து ஒத்துழைக்கவில்லை என்றால், அவரை பேருந்திலிருந்து இறங்குமாறு Bus Captain கேட்கலாம். தேவையான சூழ்நிலையில் Bus Operations Control Centre அல்லது காவல்துறையின் உதவியையும் கோரலாம்.
புதிய விதிமுறைகள் அமலுக்கு வந்தாலும், உடல் அல்லது மனநலக் குறைபாடுகள் போன்ற காரணங்களுடன் தொடர்புடைய சம்பவங்களில் விவேகத்துடனும் நியாயமாகவும் நடவடிக்கை எடுக்கப்படும் என்று LTA தெரிவித்துள்ளது.
பொதுப் போக்குவரத்து அனைவரும் பகிர்ந்து பயன்படுத்தும் இடம் என்பதால், ஒவ்வொரு பயணியும் மற்றவர்களுக்கு இடையூறு ஏற்படாத வகையில் பொறுப்புடன் நடந்து கொள்ள வேண்டும் என LTA வலியுறுத்தியுள்ளது.
புதிய விதிமுறைகள் செப்டம்பர் 23, 2026 முதல் அமலுக்கு வருவதால், சிங்கப்பூரில் பேருந்தில் பயணம் செய்யும் பொதுமக்கள் புதிய விதிகளை கவனத்தில் கொள்வது முக்கியமாகிறது.
Follow us on : click here
Premium Job Link:https://www.sgtamilan.com/product/premium-member-ship
WHATSAPP CHANNEL LINK